O‘zbekistonning Qozog‘istondagi diplomatik vakolatxonasida “O‘zbek milliy kiyimlari kuni” mavzusida brifing o‘tkazildi

Navro‘z umumxalq bayramini munosib nishonlash, madaniy-ma’naviy hamda targ‘ibot tadbirlari hamda yurtimizning boy madaniy merosini va o‘zbek xalqiga xos milliylikni keng targ‘ib qilishga, shuningdek milliy qadriyatlarimizni asrab-avaylash, milliy urf-odatlar va an’analarni qadrlash maqsadida joriy yilning 10-aprel sanasida O‘zbekistonning Qozog‘iston Respubikasidagi diplomatik vakolatxona binosida Ostona shahridagi vatandoshlar hamda o‘zbekistonlik talabalar ishtirokida “O‘zbek milliy kiyimlari kuni” mavzusida brifing o‘tkazildi.

Mazkur tadbirda Qozog‘iston tomonidan Parlament Senati a’zosi A.Sotvoldiyev, Maqsut Narikbayev Universiteti professori I.Qoraboyev, Texnologiya va biznes Universiteti professori S.Jubayev, Ostona shahridagi O‘zbek etnomadaniy markazi raisi Sh.Pulatov, Davlat va jamiyat arbobi Ye.Bekturganov, “Do‘stlik” hamjamiyati rais o‘rinbosari X.Sharipov, LINGVA TEN til markazi direktori V.Ten va boshqalar ishtirok etdi.

Uchrashuvda mazkur yo‘nalishda sa’y-harakatlar, ayniqsa, globalizatsiya jarayonlarida millat va elatlarning o‘zligi yo‘qolib ketayotgan hozirgi davrda milliy ruhni saqlab qolish, milliyligimizni keng targ‘ib qilish asrlar davomida saqlanib kelayotgan qadriyatlarimiz zanjirini davom ettirib, kelajak avlodlarga yetkazish, yoshlarda o‘zligimizni ifodalovchi belgilarga (kiyimlar, matolar, naqshlar, o‘ziga xos buyumlar va boshqalar) nisbatan iftixor tuyg‘usini shakllantirishda muhim ahamiyat kasb etishi ma’lum qilindi.

Milliy liboslar avlodlar o‘rtasidagi madaniy merosni saqlash va kelajakka yetkazishda o‘ziga xos o‘rinligi va xalqimizning tarixi va qadriyatlari ramzi sifatida ham xizmat qilishi ta’kidlandi.

Mazkur tadbir avlodlar o‘rtasidagi madaniy merosni saqlash va kelajakka yetkazishda o‘ziga xos o‘rin tutishi hamda milliy mafkura va ma’naviy qadriyatlarni shakllantirish, yoshlar tarbiyasida kiyinish madaniyatini to‘g‘ri yo‘naltirish muhim ahamiyat kasb etishi, atlas, adras, beqasam singari matolardan tikilgan milliy liboslarimiz ko‘rkam va o‘ziga xosligi bilan har qanday kishini hayratga solishi ma’lum qilindi.

So‘zga chiqqan mehmonlar o‘zbek-qozoq munosabatlarining tarixiy qadriyati, bugungi kundagi oliy darajasi, ikki davlat Rahbarlarining ikki tomonlama hamkorligining mustahkamlanishiga qo‘shayotgan hissasini yuqori baholab, 2024 yildagi avgust oyidagi va joriy yil mart oyidagi oliy darajadagi uchrashuvlarni misol sifatida keltirishdi.

Uchrashuv so‘ngida, mehmonlarga bayram dasturxoni tashkil qilinib, o‘zbek milliy taomi osh berildi.