Bugun Samarqand shahrida O‘zbekiston va Yevropa Ittifoqi (YEI) o‘rtasidagi hamkorlikni yangi bosqichga olib chiqishi kutilayotgan “Markaziy Osiyo – Yevropa Ittifoqi” birinchi sammitiga start beriladi. Bu tarixiy tadbirda ikki tomonlama munosabatlarning turli jihatlari muhokama qilinadi va muhim kelishuvlar istiqboldagi qadamlarga yo‘l ochadi.
So‘nggi yillarda O‘zbekiston va YEI o‘rtasidagi savdo hajmi barqaror o‘sishga erishdi. Xususan, Yevropa Ittifoqi O‘zbekistonning ikkinchi yirik savdo hamkoriga aylandi. “Kengaytirilgan sheriklik va hamkorlik to‘g‘risidagi bitim” (EPCA) bo‘yicha muzokaralar 2018-yilda boshlangan bo‘lib, 2022-yilda asosiy muzokaralar yakunlanib, taraflar hujjatning muhtasar mazmuniga kelishib olishgan. 2025-yilda ushbu bitimning rasman imzolanishi rejalashtirilgan bo‘lib, u savdo, investitsiya, ekologiya va inson huquqlari sohalaridagi hamkorlikni institutsional asosda mustahkamlaydi.
O‘zbekistonda Yevropa kapitali ishtirokidagi 1 000 dan ziyod korxona faoliyat yuritmoqda. Umumiy investitsiya loyihalari hajmi €30 milliardni tashkil etadi. Mamlakatimiz uchun YEIdan kelayotgan sarmoyalar nafaqat sanoat, balki qayta tiklanuvchi energetika va taʼlim sohalarini ham qamrab olmoqda.
O‘zbekiston va YEI o‘rtasidagi savdo hajmi sezilarli darajada oshmoqda. Xususan, 2017-yilda $2,6 milliard bo‘lgan savdo aylanmasi 2024-yilga kelib $6,4 milliardga yetdi. Eksport 3,6 barobarga o‘sib, $472,3 milliondan $1,7 milliardga, import esa 2,2 barobarga o‘sib, $2,2 milliarddan $4,7 milliardga yetdi. Bu o‘sish ikki tomonlama savdo aloqalarining mustahkamlanishidan dalolat beradi.
Sammitda Yevropa Ittifoqi va O‘zbekiston o‘rtasidagi aloqalarni yanada chuqurlashtirish bo‘yicha yangi tashabbuslar bildirilishi kutilyapti. Xususan, “Global Gateway” tashabbusi doirasida YEI tomonidan infratuzilma va raqamli loyihalarga katta miqdorda investitsiya jalb etish rejalashtirilmoqda.
Sammit doirasidagi muzokaralar rasmiy tomonlar o‘rtasidagi ishonchni mustahkamlab, iqtisodiy, ilmiy va xavfsizlik sohalaridagi hamkorlik nafaqat O‘zbekiston, balki butun Markaziy Osiyo mintaqasi rivoji uchun xizmat qiladi.
Samarqandda o‘tkazilayotgan birinchi “Markaziy Osiyo – Yevropa Ittifoqi” sammiti O‘zbekiston va YEI o‘rtasidagi hamkorlikni yangi bosqichga olib chiqib, yangi tashabbuslar esa rivojlanish sari olib boradigan yo‘lni belgilab beradi.
Sayfiddin Jo‘rayev,
siyosiy fanlar doktori
Izoh (0)