Ota-onalarning farzandi kelajagiga mas’uliyat bilan yondashuvi bolaning yaxshi kamol topishi va muvaffaqiyatga erishishidagi muhim omildir. Bolalarni katta qilish esa filmlarda rol o‘ynash kabi oson ish emas. Shuning uchun yulduzlar tarbiya borasida ba’zan turli tajribalar o‘tkazishiga to‘g‘ri keladi. Quyida turli sohalarda mashhurlikka erishgan ota-onalarning tarbiya metodlari bilan bo‘lishishga qaror qildik.
Kim Kardashyan
Model bolaligidan yumshoq tabiatli bo‘lib, ona sifatida ham bolalariga qattiqqo‘llik qilmaydi. Bolasi bir bor iltimos ko‘zlari bilan qarashi uning qalbini eritib yuboradi va oshxonada yashirilgan barcha shirinliklarni berishga tayyor bo‘ladi.
“Mening kuchim doimo o‘zimni xotirjam tuta olishimdadir. Bolalarning o‘yin-kulgisi va sho‘xliklari mening g‘azabimni keltirmaydi va asabimni buzmaydi. Chunki bolalarga xos bunday tabiiy holat xonadonimizning ajralmas qismiga aylangan. Bizning uyimiz doimo chaqaloqlar kulgisi va shovqiniga to‘ladir”, deydi Kim Kardashyan.
Shunga qaramay, Kardashyan yaqinda o‘g‘li Sent bilan shartnoma tuzdi. Qoidaga ko‘ra uning YouTube’dagi videoblogida uydagi shaxsiy vaziyat va holatlar chiqmasligi lozim. Shu sababli sakkiz yoshli bola sirlarni oshkor qilmaslik to‘g‘risida maxfiylik shartnomasini imzolagan.
Peris Hilton
Peris ona bo‘lganiga hali ko‘p bo‘lgani yo‘q. Uning to‘ng‘ich farzandi Feniks bir yoshdan oshgan, London ismli qizi esa undan ham kichik. Ammo yulduz allaqachon tarbiya berish bo‘yicha o‘z rejalarini ishlab chiqqan. Aktrisaning fikricha, bugungi kunda bolalar uchun eng xavfli narsa bu gadjetlardir.
“Ba’zi ota-onalar farzandi juda kichik davridanoq qo‘liga smartfon tutadi. Internet olami esa bolalarim ko‘rmasligi kerak bo‘lgan ma’lumotlarga to‘la. O‘zimdan kutmagan edim, lekin menimcha qattiqqo‘l ona bo‘lsam kerak. Farzandlarim ilk yillarida telefon ko‘rmasliklari uchun qattiq kurashaman”, deydi Peris.
Kris Hemsvort
Hech qanday ish, hatto o‘ta band kun tartibi ham Kris Hemsvortning ajoyib ota bo‘lishiga to‘sqinlik qilmaydi. U bo‘sh vaqtini tog‘larda, baliq ovida va sohilda oilasi bilan o‘tkazadi. Aktyorning fikricha, u farzandlari uchun yaxshi o‘rnak bo‘lishi muhim.
“Bolalar yangi ma’lumotni shu qadar tez xotirasiga joylaydiki, fe’l-atvorimiz va barcha yaxshi-yomon amallarimizni ortimizdan takrorlaydi. Siz istaysizmi-yo‘qmi, bolalar birinchi navbatda ota-onasidan andoza oladi”, deydi aktyor.
Kris kambag‘al oilada ulg‘aygan va ota-onasini muvaffaqiyatlari uchun emas, balki unga va ukalariga bergan mehri va vaqti uchun hurmat qiladi. Hemsvort bu tajribani oilasida takrorlashga harakat qilmoqda:
“Moliyaviy jihatdan biz bolalik davrimdan ancha yaxshiroq holatdamiz, lekin farzandlarim bunga erishish oson bo‘lmasligini bilishlarini istayman. Buning uchun harakat qilish kerak va buni odatiy hol deb qabul qilmasliklari muhim”.
Iyen Somerholder
Aktyorning qizi bu yil 7 yoshga to‘ldi. U farzandiga barcha jonzotlarga yaxshi munosabatda bo‘lishni va ularga ozor bermaslikni o‘rgatadi:
“Yoshligimda kuchuklar bolasi bilan to‘la qafas ichiga kirganim hamon yodimda. Bunday ajoyib tuyg‘ularni hech qachon esimdan chiqarmayman”, deydi Somerholder.
Yulduz qiziga ham xuddi shunday iliq tuyg‘ularni singdirishga harakat qiladi:
“Kichkina bolalarni hayvonlar bilan tanishtirish orqali insonlardagi eng yaxshi fazilatlarni namoyish etasiz”, deydi Iyen.
Krishtianu Ronaldu
Ronaldudek futbol qirolining farzandi bo‘lish oson ish emas. Ayniqsa, gap sport haqida ketganda. Ammo yulduz farzandlarini biror ishga doim majburlamaydi. Shunga qaramay, agar bolalardan biri uning izidan borsa, futbolchi juda mamnun bo‘lishini tan oladi:
“Farzandlarim qaysi kasb egasi bo‘lishini faqat vaqt ko‘rsatadi. Men ularga hayotiy yo‘lini tanlashda hech qachon bosim o‘tkazmayman. Ular istaganini qilsin. Asosiysi, ular baxtli bo‘lsa bas. Bolalarim qanday yo‘lni tanlamasin, men ularni doimo qo‘llab-quvvatlayman”.
Darvoqe, Ronalduning o‘g‘li kichik Krishtianu otasining izidan ketmoqchi, u ham futbolga juda qiziqadi:
“U futbolda xuddi men kabi bo‘lishiga yuz foiz ishonchim komil. Hozircha men unga ba’zi saboqlarni berib bormoqdaman”, deydi sportchi.
Izoh (0)