Rossiya Adliya vazirligi fuqaroligi bo‘lmagan shaxslarga Rossiya Federatsiyasi Qurolli kuchlarida shartnoma asosida xizmat o‘tashga ruxsat berish taklifini ilgari surdi. Bu haqda TASS agentligi xabar bermoqda.
“Qonun loyihasi bilan “Harbiy majburiyat va harbiy xizmat to‘g‘risida”gi federal qonunga o‘zgartirishlar kiritilmoqda. Unga ko‘ra, fuqaroligi bo‘lmagan shaxslarga Rossiya Federatsiyasi Qurolli kuchlari va harbiy tuzilmalarida harbiy xizmatni o‘tash to‘g‘risida shartnoma tuzish huquqi berilishi nazarda tutilgan”, deya ta’kidlangan hujjatda.
Shuningdek, “Mudofaa to‘g‘risida”, “Harbiy xizmatchilarning maqomi to‘g‘risida”, “Rossiya Federatsiyasida davlat pensiya ta’minoti to‘g‘risida”, “Rossiya Federatsiyasida davlat xizmati tizimi to‘g‘risida”gi va boshqa bir qator federal qonunlarga tegishli o‘zgartirishlar kiritish taklif etilmoqda.
Qonun loyihasi Rossiya Federatsiyasi Ichki ishlar vazirligi, Federal xavfsizlik xizmati, Tashqi ishlar vazirligi, Jazoni ijro etish federal xizmati va Mudofaa vazirligi bilan kelishilgan. Bundan tashqari, hujjat qonun loyihalari faoliyati bo‘yicha hukumat komissiyasi tomonidan ma’qullangan.
Rossiya yuristlar assotsiatsiyasi boshqaruvi raisi Vladimir Gruzdev qonun loyihasi bilan harbiy xizmatni o‘tash bo‘yicha shartnoma tuzishni istagan fuqaroligi bo‘lmagan shaxslarga chet el fuqarolari ega bo‘lgan huquq va majburiyatlarni berish taklif etilayotganini ma’lum qildi.
“Amaldagi qonunchilikka ko‘ra, chet el fuqarolari shartnoma bo‘yicha harbiy xizmatni faqat “ofitser bo‘lmagan” lavozimlarida - askar, matros, serjant va starshina sifatida o‘tashi mumkin. Xuddi shu cheklovni fuqaroligi bo‘lmagan shaxslarga ham tatbiq etish taklif qilinmoqda”, deydi u.
Izoh (0)