Fransiya Madaniyat vazirligida O‘zbekiston Madaniyat va sanʼatni rivojlantirish jamg‘armasi raisi Gayane Umerovaga “Sanʼat va adabiyot” ordeni kavaleri nishoni topshirildi. Bu haqda “Dunyo” AA xabar berdi.
Fransiya madaniyat vaziri Rashida Dati taqdirlash marosimidagi nutqida O‘zbekiston prezidenti rahnamoligida mamlakatda madaniyat sohasini rivojlantirish borasida amalga oshirilayotgan izchil davlat siyosatini eʼtirof etish barobarida bu Fransiya bilan strategik sheriklik munosabatlarini mustahkamlashga xizmat qilayotganini taʼkidladi.
“Ushbu yuksak mukofot O‘zbekistonning xalqaro madaniy aloqalarni mustahkamlash va sanʼat sohasida global muloqotni rivojlantirishga qo‘shgan saʼy-harakatlari va hissasining eʼtirofidir. Hukumat, Prezident maʼmuriyati va Fransiya Tashqi ishlar vazirligi, diplomatik korpus vakillari, madaniyat arboblari va xalqaro hamkorlar ishtirokida O‘zbekiston vakilining ushbu orden bilan taqdirlangani Yangi O‘zbekiston madaniy diplomatiyasi samaradorligining yorqin dalilidir”, dedi vazir Rashida Dati.
So‘nggi yillarda O‘zbekiston va Fransiya o‘rtasidagi madaniyat va sanʼat sohasidagi hamkorlik bir qator muhim tashabbuslar – Luvrda o‘zbek merosiga oid keng ko‘lamli ko‘rgazmadan tortib, xalqaro madaniy anjumanlarda faol ishtirok etishgacha bo‘lgan ishlar tufayli yangi bosqichga ko‘tarildi.
“Sanʼat va adabiyot” ordeni kavaleri nishoni – Fransiyada, shuningdek, butun dunyoda sanʼat va adabiyotning gullab-yashnashiga qo‘shgan xizmatlarini taqdirlash uchun har yili dunyo bo‘ylab 60 ga yaqin kishiga beriladi.
Izoh (0)