Франция Маданият вазирлигида Ўзбекистон Маданият ва санъатни ривожлантириш жамғармаси раиси Гаяне Умеровага “Санъат ва адабиёт” ордени кавалери нишони топширилди. Бу ҳақда “Дунё” АА хабар берди.
Франция маданият вазири Рашида Дати тақдирлаш маросимидаги нутқида Ўзбекистон президенти раҳнамолигида мамлакатда маданият соҳасини ривожлантириш борасида амалга оширилаётган изчил давлат сиёсатини эътироф этиш баробарида бу Франция билан стратегик шериклик муносабатларини мустаҳкамлашга хизмат қилаётганини таъкидлади.
“Ушбу юксак мукофот Ўзбекистоннинг халқаро маданий алоқаларни мустаҳкамлаш ва санъат соҳасида глобал мулоқотни ривожлантиришга қўшган саъй-ҳаракатлари ва ҳиссасининг эътирофидир. Ҳукумат, Президент маъмурияти ва Франция Ташқи ишлар вазирлиги, дипломатик корпус вакиллари, маданият арбоблари ва халқаро ҳамкорлар иштирокида Ўзбекистон вакилининг ушбу орден билан тақдирлангани Янги Ўзбекистон маданий дипломатияси самарадорлигининг ёрқин далилидир”, деди вазир Рашида Дати.
Сўнгги йилларда Ўзбекистон ва Франция ўртасидаги маданият ва санъат соҳасидаги ҳамкорлик бир қатор муҳим ташаббуслар – Луврда ўзбек меросига оид кенг кўламли кўргазмадан тортиб, халқаро маданий анжуманларда фаол иштирок этишгача бўлган ишлар туфайли янги босқичга кўтарилди.
“Санъат ва адабиёт” ордени кавалери нишони – Францияда, шунингдек, бутун дунёда санъат ва адабиётнинг гуллаб-яшнашига қўшган хизматларини тақдирлаш учун ҳар йили дунё бўйлаб 60 га яқин кишига берилади.
Изоҳ (0)