Toshkent shahrida autizm spektri buzilgan bolalarni qo‘llab-quvvatlash maqsadida Samarqand marafon bolalar akademiyasi tashkil etildi. Bu haqda Madaniyat va san’atni rivojlantirish jamg‘armasi axborot xizmati “Daryo”ga ma’lum qildi.
Ta’kidlanishicha, mazkur akademiya autizm spektri buzilgan bolalar uchun yangi ixtisoslashtirilgan ijodiy maydondir. “Navro‘z” bog‘ida joylashgan akademiyada ijodiy va interaktiv mashg‘ulotlar uchun barcha sharoitlar yaratilgan. Akademiya dam olish maskani, ijod ishlari bilan shug‘ullanadigan ustaxona, hovli, ota-onalar uchun kutish maydonidan iborat.
Jamg‘arma ijrochi direktori Gayane Umerovaning aytishicha, ushbu akademiya bolalar va ota-onalar uchun reabilitatsiya markaziga aylanadi. Bu esa ularning ijodiy qobiliyatlarini rivojlantirishga yordam beradi.
“Jamg‘arma tomonidan to‘rt yildan beri “Samarqand marafoni” xayriya yugurishi o‘tkazilmoqda. Biz shunday xayriya sport va madaniy tadbirlar orqali O‘zbekistonda inklyuziv muhitni rivojlantirishni maqsad qilganmiz. O‘tgan vaqt davomida “Samarqand marafoni” ijtimoiy namunaga aylanib, har yili nafaqat hamshaharlarimiz balki xorijdan ham minglab sayyohlar va sportchilarni o‘ziga jalb etuvchi yetakchi sport tadbiriga aylana oldi.
Bu yilgi xayriya marafonidan ko‘zlangan maqsad muzeylarni ko‘zi ojiz va zaif ko‘ruvchilar uchun moslashtirishdan iborat”, — deydi Gayane Umerova.
Qayd etilishicha, mazkur ijodxona 2020-yilda o‘tkazilgan marafondan tushgan mablag‘lar hisobiga tashkil etilgan.
Mavzuga doir:
- “Nahotki boricha qabul qilish shunchalar imkonsiz?”. Autizmga chalingan bolani tarbiyalayotgan ota ta’limdagi diskriminatsiya, o‘zbekchilik va NNT ochish orzusi haqida
- Hammaning to‘laqonli hayotga haqqi bor. Autizmga yo‘liqqan bolalarni ijtimoiy hayotga olib kirish haqida
- Asosiy farqlari: xromosomasi va mehri biznikidan ko‘pligida. Stereotiplar hayotini barbod qilishi mumkin bo‘lgan Daun sindromli “quyosh bolalari”
Izoh (0)