Madaniyat va sanʼatni rivojlantirish jamg‘armasi ijrochi direktori Gayane Umerova 4-maydan 2024-yilning 14-yanvariga qadar davom etadigan “O‘zbekistonning arxeologik xazinalari. Makedoniyalik Iskandardan to Kushonlar sulolasigacha” nomli yangi ko‘rgazma haqida fikrlarini bildirdi. Bu haqda “Daryo” muxbiri xabar berdi.
Gayane Umerovaning aytishicha, Luvr muzeyidagi ko‘rgazmaga tayyorgarlik ko‘rish jarayonida Berlin muzeyida ham ko‘rgazma ochish xususida kelishib olingan.
“2019-yilda davlatimiz rahbarining Germaniyaga tashrifi chog‘ida memorandum imzolagandik. 3 yil davomida ko‘rgazma tashkilotchilari bilan eksponatlarni tanlash masalasida muzokaralar olib bordik. O‘shanda ko‘rgazma Kushon imperiyasi mavzusida bo‘lishi qaror qilingan edi. Tashkilotchilar asosiy eʼtiborni Qadimgi Gretsiyaning Markaziy Osiyo va Kushon imperiyasi bilan munosabatlariga qaratishdi.
Bu O‘zbekiston va uning madaniyatini xalqaro maydonda namoyish etish uchun juda to‘g‘ri konsepsiya. Har ikki ko‘rgazma birin-ketin ochilmoqda. Bu ko‘rgazmada Luvrdagidan ko‘ra 2 barobar ko‘proq eksponatlar namoyish etilmoqda. Ko‘rgazma ekspozitsiyasi uchun 1200 kvadrat metr maydon ajratilgan bo‘lib, ekpsponatlarimiz O‘zbekistonning 6 ta muzeyidan olib kelingan noyob buyumlar, Kushon imperiyasiga oid bo‘lgan 85 ta eksponat bilan birga jamoatchilikka taqdim etilmoqda. Biz turgan joy Berlin markazi sanaladi. Jeyms-Saymon Galereyasi va Bergamo hammasi bir joyda joylashgan bo‘lib, bu yerda 3 ta muzey bor. Biz taqdim etayotgan eksponatlar O‘zbekiston tarixi va madaniyatiga bo‘lgan qiziqish ortishiga sabab bo‘ladi degan umiddamiz. Bu yerda o‘sha davr xaritasini ham ko‘rish mumkin.
Biz davlatimiz rahbari bilan xalqaro maydonda ikkinchi marta shunday katta ko‘rgazmani ochyapmiz va bu bilan faxrlanamiz. Bu esa dunyo hamjamiyatida madaniy-diplomatik aloqalarni yanada mustahkamlash niyati ekanligini ko‘rsatmoqda”, — deydi u.
Izoh (0)