Madaniyat va san’atni rivojlantirish jamg‘armasi 14-19-iyun kunlari Shveysariyaning Bazel shahrida o‘tkazilayotgan o‘n oltinchi “Design Miami/Basel” ko‘rgazmasida ishtirok etmoqda. Bu haqda jamg‘arma axborot xizmati “Daryo”ga ma’lum qildi.
Ta’kidlanishicha, Madaniyat va san’atni rivojlantirish jamg‘armasi ko‘rgazmada Toshkent shahridagi Zamonaviy san’at markazini renovatsiya qilish bo‘yicha yangi konsepsiya bilan qatnashmoqda. Mazkur konsepsiya “Studio K.O.” fransuz arxitektura byurosi bilan hamkorlikda ishlab chiqilgan. Ushbu arxitektura byurosining shtab-kvartirasi Parij va Marokashda joylashgan. Jamg‘arma maxsus loyihalar doirasida tashrif buyuruvchilarga g‘ishtdan qurilgan va dizel elektr stansiyasi sifatida ishlatilib, Toshkentdagi ilk tramvay liniyasini elektr toki bilan ta’minlagan 1912-yilgi binoning “Studio K.O.” tomonidan ishlab chiqilgan me’moriy konsepsiyasini namoyish etadi.
Madaniyat va san’atni rivojlantirish jamg‘armasi kengashi raisi o‘rinbosari Saida Mirziyoyevaning ta’kidlashicha, zamonaviy san’at markazi O‘zbekiston madaniy infratuzilmasining asosiy elementlaridan biridir.
“Ko‘plab xalqaro loyihalar va milliy merosga hurmat bilan yondashgan holda qiziqarli konsepsiyalar ishlab chiqish tajribasiga ega yetakchi arxitektura studiyasi bilan hamkorlik qilishdan mamnunmiz. Birgalikda madaniyat muhiti, Toshkentning ijodkor hamjamiyatini gullab-yashnash imkonini beruvchi ko‘plab tashabbuslarimizni amalga oshirish uchun makon yaratamiz. Zamonaviy san’at markazi dunyoning madaniy xaritasidagi eng muhim nuqta, butun dunyodan ishtirokchilar va mehmonlar uchun ochiq bo‘lgan xalqaro hamkorlik platformasi bo‘ladi”, — deydi Saida Mirziyoyeva.
Madaniyat va san’atni rivojlantirish jamg‘armasi ijrochi direktori Gayane Umerovaning qayd etishicha, zamonaviy san’at markazi jamg‘arma tashabbusi bilan tashkil etilgan.
“Markaz ilk bor 2019-yilda ochilgan va Toshkent madaniy hayotining diqqatga sazovor markaziga aylandi. Bu yerda poytaxtning madaniy hayotini shakllantiradigan ko‘rgazmalar, ma’ruzalar, ochiq suhbatlar va taklif etilgan rassomlar bilan uchrashuvlar o‘tkaziladi. Markazda bo‘lib o‘tgan tadbirlarda Fransiya, Italiya, Germaniya, Buyuk Britaniya, Norvegiya, Singapur, AQSH, Rossiya va O‘zbekistondan rejissyorlar, rassomlar, kuratorlar, muzey xodimlari, me’morlar, madaniyat muassasalari rahbarlari faol qatnashgan.
Shuningdek, markaz Moskvadagi “Garaj” zamonaviy san’at muzeyi, “Aga Khan Trust for Culture” va “Aga Khan Music Initiative” madaniyat jamg‘armasi, Parijdagi “Pompidu” san’at va madaniyat markazi, Singapurdagi zamonaviy san’at markazi va Britaniyaning “Tate Modern” galereyasi bilan uzoq muddatli hamkorlik loyihalarini amalga oshiradi.
Jamg‘arma tomonidan Toshkent shahrining bir qancha mahallalarida ham san’at maskanlari, ya’ni art-rezidensiyalar barpo etish rejalashtirilgan. Rassomlik, haykaltaroshlik, kulolchilik, to‘qimachilik, kino, 3D kabi turli fan va yo‘nalishlar bilan ishlash bo‘yicha seminarlar tashkil etiladi. Ta’lim dasturi doirasida markazning asosiy binosida ijodkorlarning malakasini oshirish bo‘yicha maxsus dasturlar ishga tushiriladi. Markaz O‘zbekistonda ekologik va innovatsion madaniy muhitni yaratishga yordam beradi”, — deydi Gayane Umerova.
Ma’lum qilinishicha, “Design Miami/Basel”– 30 dan ziyod xalqaro galereyalar va dizaynerlarni birlashtirgan yetakchi dizayn ko‘rgazmasi hisoblanadi. U odamlarni g‘ayrioddiy kolleksiya dizaynlari, arxitektura loyihalari va ommaviy muhokamalar orqali birlashtiradi.
Izoh (0)