Ijtimoiy tarmoqlarda Jizzax viloyati Zomin tumanida “Tashabbusli byudjet”dagi loyihalar uchun ovoz berish jarayoni to‘xtatib qo‘yilib, go‘yoki tumandagi 60-sonli maktabga ovoz berish hali ham davom etayotgani to‘g‘risidagi murojaatlar tarqaldi.
Iqtisodiyot va moliya vazirligi mazkur xabarga munosabat bildirdi. Unda “Tashabbusli byudjet” loyihasining 2025-yilgi 1-mavsumi doirasida ovoz berish jarayonlari 10-martdan 20-martga qadar davom ettirilgani ta’kidlangan. 20-mart soat 23:59 dan so‘ng ovozlar qabul qilinmagan.
Shuningdek, ayrim tuman va shaharlar yoki aynan bir tashabbusga ustuvorlik berilmagani, buning texnik imkoniyati mavjud emasligi, qolaversa, ovozlarni hisob-kitob qilish inson omilisiz amalga oshirilishi ma’lum qilindi.
“Ochiq byudjet” portalida “Tashabbusli byudjet” jarayonining 2025-yilgi 1-mavsumi g‘olib loyihalari 21-mart kuni e’lon qilindi. Jarayonlarda mamlakat bo‘ylab jami 10 million 450 mingta ovoz berildi.
Iqtisodiyot va moliya vazirligi 2025-yilgi 1-mavsumda g‘olib bo‘lgan loyihalar bo‘yicha yo‘nalishlar kesimida maʼlumot berdi. Unga ko‘ra, loyihalarning
- 964 tasi — ichki yo‘llarni ta’mirlash bilan bog‘liq tadbirlar (1396 mlrd so‘mlik);
- 699 tasi — maktablarni ta’mirlash va moddiy-texnika bazasini rivojlantirish tadbirlari (875 mlrd so‘mlik);
- 247 tasi — sog‘liqni saqlash muassasalarini ta’mirlash va moddiy-texnika bazasini rivojlantirish tadbirlari (329 mlrd so‘mlik);
- 60 tasi — bog‘chalarni ta’mirlash va va moddiy-texnika bazasini rivojlantirish tadbirlari (72 mlrd so‘mlik);
- 44 tasi — ko‘cha chiroqlarini o‘rnatish yoki ta’mirlash tadbirlari (52 mlrd so‘m);
- 34 tasi — ichimlik suvi va oqova tizimini yaxshilash bilan bog‘liq tadbirlar (49 mlrd so‘m);
- 321 tasi — boshqa tadbirlar (415 mlrd so‘mlik) tashkil etdi.
Izoh (0)