Ижтимоий тармоқларда Жиззах вилояти Зомин туманида “Ташаббусли бюджет”даги лойиҳалар учун овоз бериш жараёни тўхтатиб қўйилиб, гўёки тумандаги 60-сонли мактабга овоз бериш ҳали ҳам давом этаётгани тўғрисидаги мурожаатлар тарқалди.
Иқтисодиёт ва молия вазирлиги мазкур хабарга муносабат билдирди. Унда “Ташаббусли бюджет” лойиҳасининг 2025 йилги 1-мавсуми доирасида овоз бериш жараёнлари 10 мартдан 20 мартга қадар давом эттирилгани таъкидланган. 20 март соат 23:59 дан сўнг овозлар қабул қилинмаган.
Шунингдек, айрим туман ва шаҳарлар ёки айнан бир ташаббусга устуворлик берилмагани, бунинг техник имконияти мавжуд эмаслиги, қолаверса, овозларни ҳисоб-китоб қилиш инсон омилисиз амалга оширилиши маълум қилинди.
“Очиқ бюджет” порталида “Ташаббусли бюджет” жараёнининг 2025 йилги 1-мавсуми ғолиб лойиҳалари 21 март куни эълон қилинди. Жараёнларда мамлакат бўйлаб жами 10 миллион 450 мингта овоз берилди.
Иқтисодиёт ва молия вазирлиги 2025 йилги 1-мавсумда ғолиб бўлган лойиҳалар бўйича йўналишлар кесимида маълумот берди. Унга кўра, лойиҳаларнинг
- 964 таси — ички йўлларни таъмирлаш билан боғлиқ тадбирлар (1396 млрд сўмлик);
- 699 таси — мактабларни таъмирлаш ва моддий-техника базасини ривожлантириш тадбирлари (875 млрд сўмлик);
- 247 таси — соғлиқни сақлаш муассасаларини таъмирлаш ва моддий-техника базасини ривожлантириш тадбирлари (329 млрд сўмлик);
- 60 таси — боғчаларни таъмирлаш ва ва моддий-техника базасини ривожлантириш тадбирлари (72 млрд сўмлик);
- 44 таси — кўча чироқларини ўрнатиш ёки таъмирлаш тадбирлари (52 млрд сўм);
- 34 таси — ичимлик суви ва оқова тизимини яхшилаш билан боғлиқ тадбирлар (49 млрд сўм);
- 321 таси — бошқа тадбирлар (415 млрд сўмлик) ташкил этди.
Изоҳ (0)