“Tashabbusli byudjet”ning 2024-yilgi 2-mavsumida ovoz yig‘ishga majburlash holatlari yuzasidan 39 ta shikoyat tushdi. Bu haqda Iqtisodiyot va moliya vazirligi xabar berdi.
Bunda, eng ko‘p murojaat kelib tushgan hududlar:
- Farg‘ona viloyatida — 7 ta;
- Toshkent shahrida — 6 ta;
- Namangan va Jizzax viloyatlarida — 5 tadan.
Sohalar kesimida:
- umumta’lim maktablari bo‘yicha — 19 ta;
- tibbiyot tashkilotlari bo‘yicha — 16 tani tashkil etgan.
Kelib tushgan barcha murojaatlar ko‘rib chiqish uchun tegishli tuman (shahar) Xalq deputatlari kengashlariga yuboriladi hamda holat o‘z tasdig‘ini topsa, mazkur loyihalar ovoz berish bosqichidan chetlatiladi yoki g‘oliblar ro‘yxatidan chiqarilishi mumkin.
“Tashabbusli byudjet”ning 2024-yilgi 2-mavsumi doirasida ovoz berish bosqichi 22-avgust kuni boshlangandi. Ovoz berish jarayonlari 31-avgust soat 23:59 ga qadar — 10 kun davom etadi.
Ushbu mavsumda fuqarolar tomonidan 27 mingdan ortiq loyiha ilgari surilgan. Shundan 23 mingdan ortiq qismi ishchi guruhlar tomonidan belgilangan mezonlarga muvofiq tanlab olindi va ovoz berish jarayoniga o‘tkazildi. G‘olib loyihalarni moliyalashtirish uchun 2 trillion so‘mdan ortiq mablag‘ yo‘naltirilishi kutilmoqda.
Izoh (0)