Ijtimoiy tarmoqlarda Toshkent shahrining Mirobod tumanida joylashgan 1928-yilda qurilgan “Geologiya muzeyining binosi buzilayotganligi” haqida xabarlar tarqaldi. Mazkur vaziyat yuzasidan Madaniy meros agentligi ma’lumot berdi.
Holat Toshkent shahar boshqarmasi mutaxassislari tomonidan joyiga chiqqan holda o‘rganildi. 2024-yilning oxirida Geologiya muzeyi Taras Shevchenko ko‘chasidan Mirzo Ulug‘bek tumani Olimlar ko‘chasi, 64-uyga barcha eksponatlari bilan birga ko‘chirilgan. T.Shevchenko ko‘chasidagi bino bugungi kunda bo‘m-bo‘sh holatda turibdi. Faqatgina Geologiya muzeyi sifatida foydalanilgan bino Moddiy madaniy merosning ko‘chmas mulk obyektlari milliy ro‘yxatida qayd etilgan.
Davlat aktivlarini boshqarish agentligi Toshkent shahar hududiy boshqarmasi va sarmoyador o‘rtasida 2022-yil 10-may kuni oldi-sotdi shartnomasi tuzilgan. Ushbu shartnoma asosida korxona tomonidan Mirobod tumanining Taras Shevchenko ko‘chasi, 11 va 11A-uylarda joylashgan bino-inshootlar “E-ausion” orqali sotib olingan.
Xususiy tadbirkor tomonidan xarid qilingan bino-inshootlar, xususan, sobiq Geologiya muzeyi binosiga zarar yetkazmaslik sharti bilan hamda muzeyning tutash devorini o‘z hisobidan tarixiy, qadimiy tusga keltirib tiklab berishga kafolat berish majburiyati bilan Madaniy meros agentligiga murojaat yo‘llangan.
Madaniy meros agentligi huzuridagi Ilmiy-ekspert kengashining 2024-yil 23-mart kuni imzolagan 13-sonli yig‘ilish bayonida Toshkent shahar Mirobod tumani Taras Shevchenko ko‘chasi, 11-uy manzilida joylashgan sobiq Geologiya muzeyi binosining muhofaza hududida ko‘p qavatli turar-joy binosini qurish loyihasi, madaniy meros obyektidan 50 metr masofani saqlagan holda qurilish ishlarini olib borilishiga ruxsat berilgan.
2024-yil 9-iyul kuni sarmoyador tomonidan poytaxtning Mirobod tumani, Taras Shevchenko 11-uy manzilida joylashgan bino-inshootlarni rekonstruksiya va qayta moslashtirish bo‘yicha o‘rnatilgan tartibda loyiha hujjatlarining taklifi ishlab chiqilib, Agentlikning Toshkent shahar boshqarmasiga taqdim etilgan.
Ushbu murojaat yuzasidan Agentlik huzuridagi Ilmiy-ekspert kengashi a’zolari tomonidan joyiga chiqqan holda batafsil o‘rganilgan. Kengash a’zolariga ko‘ra, Taras Shevchenko ko‘chasi, 11A-uyda joylashgan sobiq Geologiya muzeyi binosiga tutash qurilgan manzildagi bino-inshoot tadbirkor tomonidan xarid qilingan, Madaniy meros hisoblanmagan qisminigina buzishdan avval ushbu binoning dastlabki qiyofasidagi asl loyihasini topish va arxiv ma’lumotlarini batafsil o‘rganib chiqish zarurligi ta’kidlangan.
Xususan, Taras Shevchenko ko‘chasidagi binoda obyektning namgarchiligini qochirish va sho‘rlanishning oldini olish uchun amalga oshiriladigan zondlab tekshirish chora-tadbir ishlarini olib borish belgilangan.
Kengash a’zolari tomonidan atroflicha o‘rganib chiqilganidan so‘ng, 2024-yilning 1-avgust kuni yuqorida ko‘rsatilgan manzilda buzish renovatsiya ishlari loyihasini ishlab chiqish tavsiya etilgan. Ushbu ishlarni olib borish jarayonida bino madaniy meros obyektidan buzish rejalashtirilgan bino poydevori 5 metrdan kam bo‘lmagan qismini saqlab qolish hamda tarixiy binoga tutash joyda temir beton qismlarini tayanch holda saqlanib qoldirish shart ekani belgilab qo‘yilgan.
Mazkur binoning tashqi ko‘rinishidagi asosiy arxitektura, me’moriy yechimlarini saqlab qolish va rekonstruksiya qilish qismida ham saqlab qolinishi tavsiya etilgan. Mazkur ishlarni olib borishda Agentlik huzuridagi Ilmiy-ekspert kengashi a’zolari F.Usmonov, X.Sultonov hamda M.Mumin-Oxunovalar nazorati ostida amalga oshirilishi belgilab qo‘yilgan.
Ma’lumki, Vazirlar Mahkamasining 2024-yil 20-maydagi 295-son qarorning 5-bandida “Moddiy madaniy merosning ko‘chmas mulk obyektlari va ularning qo‘riqlanadigan tegralarida yer qazish, yer tuzish, qurilish, melioratsiya va boshqa xo‘jalik ishlari, asrashga doir ishlarni amalga oshirish hamda ilmiy va ilmiy-texnik tadqiqotlar o‘tkazishga oid loyihalarga Madaniy meros agentligi huzuridagi Ilmiy-ekspert kengashi tomonidan xulosa berish” vazifalari belgilangan.
Geologiya muzeyi hozirgi vaqtda Tog‘-kon sanoati va geologiya vazirligi tasarrufida bo‘lib, hozirda muzeyni qayta ochish jarayonlari ketmoqda.
Samarqandda Amir Temur oila a’zolari yashagan majmua 415 mln so‘mga restavratsiya qilinayotgani xabar qilingan edi.
Shuningdek, Samarqand viloyatidagi XIX-XX asrlarga oid 3 ta tarixiy masjid binolari buzib tashlangani aniqlangandi.
Izoh (0)