Mo‘g‘uliston poytaxti Ulan-Bator shahrida UNESCO Osiyo va Tinch okeani havzasi bo‘yicha Jahon xotirasi qo‘mitasining 10-yig‘ilishi bo‘lib o‘tdi. Bu haqda Madaniyat va san’atni rivojlantirish jamg‘armasi matbuot xizmati xabar berdi.
Qayd etilishicha, yig‘ilishda UNESCO ishlari bo‘yicha O‘zbekiston milliy komissiyasi tashabbus ko‘rsatgan ikki nomzodnoma Osiyo va Tinch okeani havzasining Jahon xotirasi ro‘yxatiga kiritildi.
Jahon xotirasi ro‘yxatidan “Turkiston albomi (1871-1872)” va “Xudoybergan Devonovning Xorazm vohasi fotosuratlari (1879-1937)” munosib o‘rin oldi.
Mintaqaviy nominatsiyalarning mazkur Jahon xotirasi ro‘yxatiga kiritilishi bebaho hujjatli yodgorliklarni asrab-avaylashga xizmat qiladi, — deyiladi xabarda.
“Turkiston albomi (1871−1872)” nominatsiyasi ilmiy va tarixiy ahamiyatga ega bo‘lgan nodir fotosuratlar va rangli tasvirlarni o‘z ichiga olgan hamda O‘zbekiston Milliy kutubxonasi fondlarida saqlanadi. “Turkiston albomi” tarixiy, arxeologik, etnografik va hunarmandchilik bo‘limlaridan iborat.
“Xudoybergan Devonovning Xorazm vohasi fotosuratlari (1879−1937)” xivalik o‘zbek fotograf-novatori, kinematografi, rejissyori va operatori Xudoybergan Devonovning kolleksiyasini aks ettiradi.
Avvalroq O‘zbekiston Madaniyat va san’atni rivojlantirish jamg‘armasi tashabbusi bilan 21 ta bino modernizm davri obyekti maqomini oldi va milliy madaniy meros obyektlari ro‘yxatiga kiritilgani to‘g‘risida xabar berilgandi.
Izoh (0)