O‘zbekistondagi madaniy meros obyektlardan 156 tasi qabristonlarga aylantirilgani aniqlandi. Bu haqda Madaniy meros agentligi va Bosh prokuratura rahbariyati hamda mutasaddilari ishtirokida o‘tkazilgan matbuot anjumanida ma’lum qilindi.
Bosh prokuratura bilan birgalikda yil davomida Toshkent shahri, Jizzax, Xorazm, Navoiy, Qashqadaryo, Toshkent, Buxoro viloyatlaridagi arxeologiya merosi obyektlarining muhofaza va saqlanish holati o‘rganilgan. Jumladan, Buxoro viloyatida joylashgan 287 ta arxeologiya merosi obyektidan 272 tasi o‘rganib chiqilgan. Bu jami obyektlarning 95 foizini tashkil etadi. O‘rganilgan obyektlardan 156 tasi qabristonlarga aylantirilgan, 5 tasiga zarar yetkazilgani aniqlangan.
Qayd etilishicha, O‘zbekistonda hozirgi kunga qadar 8 ming 209 ta moddiy madaniy merosning ko‘chmas mulk obyektlari aniqlangan bo‘lib, shundan 4 ming 748 ta arxeologiya merosi obyekti hisoblanadi.
2023-yilda madaniy meros obyektlari hamda uning tutash hududlarda 160 ta noqonuniy holatlar aniqlangan hamda huquqni muhofaza qiluvchi organlarga murojaat qilingan.
Izoh (0)