Toshkent shahrida arxitektor Vladimir Spivakning loyihasi asosida 1982-yil qurilib, 2000-yildan so‘ng qarovsiz yotgani sabab tashlandiq holga kelgan Chorsu mehmonxonasi buziladi.
O‘rnida qiymati 170 million dollardan kam bo‘lmagan zamonaviy 29 qavatli mehmonxona, biznes markazi va turar-joylar barpo etiladi.
Bu haqda 2-noyabr kuni Hilton mehmonxonasida masʼullar ishtirokida bo‘lib o‘tgan matbuot anjumanida maʼlum qilindi.
Bildirilishicha yangi mehmonxona, biznes-markazi va turar joylarni qamrab oluvchi yangi loyihani Drezdendagi Postplatz maydoni, Berlindagi EDGE Suedkreuz majmui va boshqa ko‘plab inshootlar rekonstruksiyasi muallifi — Tchoban Voss Architekten nemis kompaniyasi ishlab chiqqan.
Taʼkidlanishicha, mazkur ishlar 2025-yilda boshlanadi. Qurilishga uch yarim yil muddat sarflanadi va maydonning ochilishi 2029-yilga mo‘ljallanmoqda.
Maydonning rekonstruksiya qilinishi 620 ta yangi ish o‘rnini yaratib, Toshkent fondiga qariyb 113 ming metr kvadrat turar-joy va ko‘chmas mulklarni qo‘shadi. Vazifa murakkab hamda masʼuliyatli ekanligini tushungan holda, loyihani ishlab chiqish uchun dunyodagi eng yaxshi yuzta arxitektorlar reytingidan o‘rin olgan hamda o‘zining Yevropa mamlakatlarida, shuningdek Gruziya, Ozarbayjon va Rossiyadagi ishlari bilan nom qozongan mashhur arxitektor Sergey Choban tomonidan asos solingan Germaniyadagi Tchoban Voss yirik byurosi taklif qilindi. Avvalo loyihada Chorsu mehmonxonasi o‘ynagan dominantalik rolini saqlab qolamiz. Yangi bino Navoiy ko‘chasi istiqbolini yakunlovchi tanish mehmonxona shakl-shamoyilini takrorlaydi. Natijada davrlar izchilligini taʼminlanib, shahar landshaftidagi odatiy va taniqli mo‘ljan – bozor va madrasa qatorida tumanning ramzlaridan biri saqlab qolinadi, — deydi loyihani ishlab chiqish guruhi rahbari Andrey Trebunskix.
Qayd etilishicha, yer maydoni bo‘ylab diagonaliga Chorsu bozori hamda yonida reteyl, do‘konlar va kafelarning asosiy qismi joylashadigan bosh univermag (GUM) binosini o‘zaro bog‘laydigan bulvar o‘tadi.
Yangilangan mehmonxona shahar mehmonlarini qarshi olish uchun munosib maskan, ochiqlik va mehmondo‘stlik ramziga aylanadi. Uning qiyofasi zamonaviy meʼmoriy tendensiyalar va milliy anʼanalarni mujassam qilib, shaharning ushbu qadimiy qismidagi tarixiy mavjudlikka hurmat bilan munosabatda bo‘ladi. Qolaversa zamonaviy Toshkent ramzlaridan biri maqomiga daʼvo qiladi. Chorsu maydonining yangi qiyofasi poytaxtning eski shaharini o‘zgartirib yuboradi. Bu yerda sarmoyalar va biznes uchun muhim tortishish nuqtasi paydo bo‘ladi. Biz majmuamiz eng yirik mahalliy va xalqaro kompaniyalar ofislarining uyiga aylanishini kutmoqdamiz. Zamonaviy mehmonxona esa sayohatchilarga eski Toshkentning naqd yuragida eng yirik megapolislar darajasidagi qulaylikda yashash imkonini beradi, — deydi loyiha tashabbuskorlari.
Bloger Nikita Makarenko Chorsu mehmonxonasining ayni kundagi ko‘rinishi judayam achinarli ekanini, uni qayta tiklash maqsadga muvofiqmasligini yozmoqda.
Mehmonxonaning hozirgi holati uni qayta tiklash mumkin emasligidan dalolat bermoqda. U o‘smirlar o‘ralashib yuradigan xavfli “tashlangan joy”ga aylanib ulgurdi. Ammo uning taqdiri bizga saboq bo‘lishi kerak. Haligacha saqlanib qolgan modernizm yodgorliklarini qattiq himoya qilishimiz zarur. Va hozir kerak bo‘lgan paytda taʼmirlashni boshlang. Ular parchalanib ketguncha kutmang, — deydi u.
Tadbirda qatnashgan bloger Aleksandra Ivanyujenko Chorsu yigirma yildan beri “yasharmaganini” taʼkidlamoqda.
Yigirma yildirki, shu bino yasharmadi, natijada shahar markazida tashlandiq ulkan bino paydo bo‘ldi. Hamma narsani avvalgidek qoldirishingiz mumkin, ammo bu juda shubhali. Arxitektorlarning xulosasiga ko‘ra, 14-qavatdan yuqorida joylashgan hamma narsani mustahkamlash kerak, ammo ta’mirlash ishlari olib borilgan bo‘lsa ham bino endi shift balandligi talablariga javob bermaydi, — deydi u.
2020-yilda davlat aktivlarini boshqarish agentligi tomonidan Chorsu mehmonxonasi binosi E-auksion platformasida ochiq savdolar orqali BAAdagi Ittihad International Investment LLC kompaniyasiga 16,9 mlrd so‘mga sotilgan. Hozirda o‘zbekistonlik va xorijlik investorlar konsorsiumi loyihada ishtirok etmaslikka qaror qilgan. Aytilishicha, Ittihad International Investment LLC kompaniyasidan obyektni sotib olish bo‘yicha bitimni yopish jarayoni amalga oshirilmoqda. Bitimning qiymati va investorlar guruhining tarkibi kelishuvga erishilganidan so‘ng eʼlon qilinadi.
2024-yilning oktyabr oyida yakunlangan texnik ekspertizaning ko‘rsatishicha, yog‘ingarchilik va atrof-muhit taʼsiri natijasida mehmonxona binosining temir-beton konstruksiyalari jiddiy deformatsiyaga uchrab, qisman barbod bo‘lgan. Armaturali o‘zaklar 20 foizgacha maydonini yo‘qotib, korroziyaga uchragan. 14-qavatdan boshlab bino tepasigacha barcha ustunlar hisob talablariga muvofiq emas. Ekspertiza xulosasiga ko‘ra, bino rekonstruksiya qilinishi mumkin emas, deydi matbuot anjumanida so‘z olganlar.
Madaniy meros agentligining Toshkent shahar boshqarmasi masʼuliga ko‘ra, Chorsu mehmonxonasi qo‘riqlanadigan maqomga ega emas va shu paytga qadar madaniy meros obyekti sifatida umuman ro‘yxatda turmagan.
Izoh (0)