“Ogohlantiruvchi signal chalingan”. Toshkentda teplovoz va avtobus to‘qnashuvi bo‘yicha qo‘shimcha ma’lumot berildi

Toshkentning Sergeli tumanida teplovoz va avtobus o‘rtasida to‘qnashuv sodir bo‘lgandi. “O‘zbekiston temir yo‘llari” holatga izoh berdi.

Unda aytilishicha, “O‘zbekiston” lokomotiv deposiga qarashli bo‘lgan TEM2-1959 rusumli teplovozi avtomobil yo‘li bilan kesishgan temiryo‘l izidan meyoriy tezlikni saqlab, hushyorlikni yo‘qotmasdan, ogohlantiruvchi signal ishlatib kelayotgan vaqtda Qumariq—Aeroport yo‘nalishdagi yo‘lovchi avtobusi avtomobil yo‘liga o‘rnatilgan yo‘l belgilariga (Stop) rioya qilmagan holda harakatni davom ettirgan.

Oqibatda lokomotiv va avtobus o‘rtasida yo‘l-transport hodisasi ro‘y bergan.

“Toshshahartransxizmat” munosabatida teplovoz tartibga solinmagan temiryo‘l kesishmasidan harakatlanib o‘tishidan avval yo‘nalish bo‘ylab transport vositalarini to‘xtatib turuvchi temiryo‘l nazoratchi xodimi voqea joyida bo‘lmagani sababli transport vositalarini to‘xtatish choralari ko‘rilmagani aytilgandi.

Yo‘l-transport hodisasidan jabrlanganlar yo‘q, holat yuzasidan surishtiruv ishlari olib borilmoqda.