Ukraina mudofaa vaziri Denis Shmigal 25-avgust kuni Kiyevda Ruminiya, Litva va Kanada mudofaa vazirlari bilan alohida uchrashuvlar o‘tkazdi. Muzokaralarda harbiy-texnik hamkorlikni kengaytirish, xususan, dron ishlab chiqarish va uzoq muddatli harbiy yordam ko‘rsatish masalalari muhokama qilindi. Bu haqda Anadolu xabar berdi.
Ukraina mudofaa vazirligiga ko‘ra, Shmigal Ruminiya bosh vaziri o‘rinbosari va mudofaa vaziri Liviuy-Ionut Mosteanuning Ukrainaga ko‘rsatayotgan yordamini e’tirof etib, bu davlat hozirgacha 22 ta harbiy yordam paketi yuborganini, yaqin kunlarda esa 23-paket yetkazilishi rejalashtirilganini ma’lum qilgan.
“Ruminiya ukrainalik F-16 uchuvchilarini tayyorlashni davom ettirmoqda, bu esa havo hujumidan mudofaa tizimimizni shakllantirishda muhim ahamiyatga ega. Biz havo mudofaasi bo‘yicha hamkorlikni yanada kuchaytirishga kelishib oldik”, dedi Shmigal.
Uchrashuv chog‘ida tomonlar dronlarni birgalikda ishlab chiqarish imkoniyatlari va Ruminiyaning NATO tashabbusi doirasida boshlangan PURL (Prioritized Ukraine Requirements List) dasturiga qo‘shilishi ehtimoli yuzasidan fikr almashgan. Ushbu tashabbus orqali AQSH qurollari Ukraina armiyasiga yetkazib beriladi.
Litva mudofaa vaziri Dovile Sakalyene bilan bo‘lib o‘tgan muzokarada Shmigal ikki davlat o‘rtasida qo‘shma harbiy ishlab chiqarishni yo‘lga qo‘yish bo‘yicha anglashuv xatini imzoladi.
“Biz uzoq masofaga mo‘ljallangan dronlar ishlab chiqarishga alohida e’tibor qaratmoqdamiz. Litvaning 2027-yilgacha yalpi ichki mahsulotning 0,25 foizini Ukraina harbiy yordamiga ajratish ahdi esa uzoq muddatli qo‘llab-quvvatlashni anglatadi”, dedi Ukraina rasmiylari.
Kanada mudofaa vaziri Devid Makginti bilan uchrashuvda sanoat kooperatsiyasi va ayniqsa dron ishlab chiqarish sohasiga sarmoyalarni kengaytirish masalasi keng muhokama qilingan. Shmigal Ottavaning dronlar va o‘q-dorilarni o‘z ichiga olgan 1 milliard dollarlik harbiy yordami hamda PURL dasturiga ajratgan 500 million dollarlik hissasini yuqori baholagan.
So‘nggi oylar ichida Ukraina NATO va Yevropa ittifoqi davlatlari bilan harbiy-texnik hamkorlikni jadallashtirmoqda. Ayniqsa dron ishlab chiqarish salohiyatini oshirish va uzoq muddatli strategik yordamlarga erishish maqsad qilingan. Ruminiya va Litva — Yevropadagi eng faol Ukraina tarafdorlari qatoridan joy olgan bo‘lsa, Kanada esa eng yirik yevropalik bo‘lmagan homiy sifatida ajralib turadi.
Izoh (0)