Venesuelada saylov natijalaridan so‘ng ommaviy namoyishlar boshlandi (video)

Venesuelada prezidentlik saylovlari natijalaridan so‘ng namoyishlar avj oldi, muxolifat vakillari saylov natijalaridan norozi bo‘lmoqda. Bu haqda BBC xabar berdi.

Ma’lum qilinishicha, politsiya xodimlari va harbiylar bilan to‘qnashuvlar boshlangan. Miraflores prezident saroyiga kirish yo‘llari to‘sib qo‘yilgan. Karakas shahrining markaziy hududlarida tayoq va “Molotov kokteyli” bilan qurollangan yuzlab odamlar to‘plangan. Ko‘chalarda mashinalar, shinalar, chiqindilar yoqib yuborilgan. Namoyishchilar bilan qurollangan politsiya o‘rtasida to‘qnashuvlar yuz bergan.

Politsiya va harbiylar prezident saroyi atrofidagi ko‘chalarni to‘sib, namoyishchilarga plastik o‘qlar va ko‘zdan yosh oqizuvchi gaz granatalari qo‘llagan. Namoyishchilar bunga toshlar va “Molotov kokteyli” bilan javob qaytargan.

Lotin Amerikasining bir qator davlatlari saylov ovozlarini sanab chiqishda shaffoflik zarurligiga e’tibor qaratib, saylov natijalarini qayta ko‘rib chiqishni talab qilgan. Argentina Maduroning g‘alabasini tan olishdan rasman bosh tortgan. Chili saylov natijalari xalqaro kuzatuvchilar tomonidan tasdiqlanganidan keyingina tan olinishini qayd etgan.

Tanqidlarga javoban Karakas Argentina, Dominikan Respublikasi, Kosta-Rika, Panama, Peru, Urugvay va Chilidagi diplomatlarini chaqirib olgan. Venesuela rasmiylari mazkur mamlakatlarni saylov jarayoniga aralashishda ayblagan. Panama ham vaziyatga javoban Venesuela bilan munosabatlarni to‘xtatib, diplomatlarini chaqirib olganini eʼlon qilgan.