Namanganda 2024-yilning oktyabr oyida maktab o‘quvchisi boshqaruvidagi ijaraga olingan Gentra yuk mashinasi bilan to‘qnashib ketgandi. Ushbu holat bo‘yicha “Daryo”ga murojaat qilib tushdi.
Taʼkidlanishicha, ayni shu hodisa 2024-yilning o‘zida Namangan shahrida maktab o‘quvchilari ijaraga olgan mashinada sodir bo‘lgan to‘rtinchi avariya ekani maʼlum qilingan. Ularning barchasi o‘lim bilan tugagan.
Umuman olganda, mashina ijara berish bilan shug‘ullanuvchi “Rent Car” biznesining ayrim vakillari voyaga yetmagan, haydovchilik guvohnomasi va ko‘nikmasiga ega bo‘lmagan bolalarga ham avtomobillarni ijaraga berayotgani, voqealar esa aksariyat holatda katta ko‘ngilsizlik bilan yakunlanayotganini ko‘rsatmoqda.
Tahririyatga boquvchisini yo‘qotgan onaning yozgan murojaatida ushbu voqea bo‘yicha quyidagilar bayon etilgan.
Ayolning 2006-yil 11-iyunda tug‘ilgan farzandi Q.X. 2024-yil fevral oyida Toshkent shahridagi avtomobil ijarasi bilan shug‘ullanuvchi firmadan Gentra avtomashinasini olgan, boshqacha aytganda “rentkarchilar” hech qanday hujjatsiz voyaga yetmagan bolaga mashina bergan.
Bola esa o‘sha avtomobilda Samarqand viloyatining Payariq tumaniga yo‘l olgan. Yo‘lda avtohalokat ro‘y bergandan so‘ng Q.X. Chelak shahridagi ustaxonalarning birida mashinani taʼmirlatgan. Ammo hammasi shu bilan tugamagan.
Hodisadan xabar topgan “rentkarchilar” boladan ko‘proq pul undirish maqsadida qo‘rqitish yo‘liga o‘tgan. 2024-yil 3-iyunda o‘smir yigitni o‘sha paytda ishlab yurgan ofisidan olib chiqib ketishgan va qandaydir nomaʼlum binoga olib kelib “Mobil qurilmani qarzga oldim” degan mazmunda tilxat yozishga majburlashgan.
Ular video bo‘yicha huquqni muhofaza qiluvchi organlarga murojaat qilmagan. Taʼkidlanishicha, bunga “Nega o‘zlaring yosh bolaga mashina bergansan” mazmunidagi ehtimoliy savoldan cho‘chigan bo‘lishi mumkin.
Ular Q.X. voyaga yetib, qo‘liga pasport olishini kutgan va keyin ariza bergan. Shundan so‘ng ona-bola Ichki ishlar boshqarmasiga chaqirtirilgan. 2024-yil 2-iyul kuni profilaktika inspektori ular bilan suhbat o‘tkazgan, savol-so‘roqdan keyin inspektor “rentkarchilar” noqonuniy ish qilganini aytib, tushuntirish xati yozib ketishni so‘ragan. Ona-bola yozgan, shu bilan ularga boshqa qo‘ng‘iroq bo‘lmagan.
2025-yil 6-yanvarda Payariq tumanidagi Majburiy ijro byurosining — rentkarchilar foydasiga qariyb 25 mln so‘m, 1 mln so‘m esa davlat boji undirilishi belgilangan fuqarolik ishlari bo‘yicha Payariq tumanlararo sudining 2024-yil 7-noyabrda qonuniy kuchga kirishi belgilangan ijro varaqasi o‘rtaga chiqqan. Yaʼni boquvchisini yo‘qotgan, kunlik 100 ming so‘m evaziga oila (biri bebosh o‘g‘il, biri turmushidan ajralgan xasta qizi va uning nogiron nabirasi) tebratayotgan ona navbatdagi “syurpriz”ni qabul qilib olgan. Sudda esa na ona va na uning o‘g‘li ishtirok etgan. Hech qanday tergov ishlariga jalb etilmagan.
“Daryo” voqealar rivojini kuzatib boradi.
Izoh (0)