АҚШ президенти Жо Байден аргентиналик футболчи Лионель Месси, баскетболчи Меджик Жонсон ва Американи яхшироқ қилишга ҳисса қўшган яна 17 нафар шахсни Президентнинг Озодлик медали билан мукофотлади. Бу ҳақда Оқ уй хабар берди.
Маълум қилинишича, Месси тиғиз график туфайли тақдирлаш маросимида қатнаша олмаган.
“Мен учун бундай эътирофга сазовор бўлиш катта шараф. Бу улкан имтиёз ва бундан жуда миннатдорман. Афсуски, аввалдан белгиланган мажбуриятим бор, шунинг учун Оқ уйда бўлиб ўтадиган мукофотлаш маросимида қатнаша олмайман. Бироқ, шуни билингки, ушбу ҳаракатни чин дилдан қадрлайман”, деган Месси.
Месси ва Жонсондан ташқари, АҚШ собиқ давлат котиби Хиллари Клинтон, америкалик миллиардер Жорж Сорос, америкалик моделер Ралф Лорен, ирландиялик мусиқачи Боно, америкалик актёр Дензел Вашингтон ва бошқалар Президентнинг Озодлик медали билан тақдирланган.
♦ Президентнинг Озодлик медали — фуқаролар учун тақдим этиладиган АҚШнинг икки энг юксак мукофотидан бири бўлиб, президент қарорига кўра топширилади. Озодлик медали хавфсизлик ва АҚШ миллий манфаатларини ҳимоя қилишга, бутун дунёда тинчликни таъминлашга, шунингдек, АҚШ ва жаҳоннинг ижтимоий ҳамда маданий ҳаётига салмоқли ҳисса қўшган шахслар учун берилади.
2007 йилда Месси ўзининг хайрия фондини яратди ва у орқали қийин вазиятларда муҳтож болаларга ёрдам беради. Аргентиналик футболчи UNICEFнинг яхши ният элчиси ҳам ҳисобланади.
♦ Месси 37 ёшда. У саккиз карра “Олтин тўп” соҳиби ҳисобланади. Футболчи 2023 йилнинг ёзидан бери “Интер Миами”да ўйнамоқда, унинг шартномаси 2025 йил охиригача амал қилади. Аргентиналик футболчи аллақачон жамоа билан Леагуэс Cуп (2023), MLS мунтазам чемпионлигини (2024) қўлга киритган, шунингдек, АҚШ кубоги финалига чиққан.
Аввалроқ Месси “Интер Майами” унинг фаолиятидаги сўнгги клуб бўлишини маълум қилганди. 2000 йилдан 2021 йилгача аргентиналик ҳужумчи “Барселона”, 2021 йилдан 2023 йилгача эса Франциянинг “ПСЖ” жамоасида ўйнаган. Месси Аргентина терма жамоасида 189 та ўйин ўтказиб, 112 та гол урган ва 60 та голли узатмани амалга оширган. Миллий терма жамоа таркибида у жаҳон чемпионати (2022), “Финалиссимо” (2022) ва икки марта Америка кубогини (2021, 2024) ҳамда Олимпиадада (2008) ғолиб чиққан.
Изоҳ (0)