“Bugun vafot etgan qirol Pelening sarguzashtiga ko‘tarinki ruh va muhabbat hamrohlik qildi. Sevgi, sevgi va sevgi. Abadiy”. Pelening vafotidan keyin uning ijtimoiy tarmoqdagi sahifasida shunday jumlalar qoldirildi.
Butun dunyo “futbol qiroli” bilan xayrlashmoqda. “Daryo” ularning asosiylarini bitta sahifaga jamladi.
Pele faoliyatidagi asosiy klub hisoblangan “Santos” oltin toj suratini joyladi va izohga bitta so‘z yozdi: “Abadiy”.
Kilian Mbappe: “Futbol qiroli bizni tark etdi, biroq uning merosi hech qachon unutilmaydi. Abadiy orom ol, Qirol”.
Krishtianu Ronaldu: “Braziliya xalqi, xususan, janob Edson Arantis du Nasimentuning oilasiga hamdardlik bildiraman. Butun futbol ahli his qilayotgan og‘riqni ifodalash uchun abadiy qirol Pelega shunchaki ‘xayr’ deyish kamlik qiladi. Bir necha million kishini ilhomlantirgan, kecha, bugun va butun kelajak etaloni”.
Erling Holand afsonaga bitta gap bilan ta’rif berdi: “Zamonaviy futbolda nimaniki ko‘rsangiz, qachonlardir uni birinchi bor Pele amalga oshirgan bo‘ladi”.
Garet Beyl Pelega quyidagi ta’rifni berdi: “Ko‘plar futbolni nima sababdan bu qadar yaxshi ko‘rishining sababi”.
Lionel Messi qisqaroq qildi: “Abadiy orom ol, Pele”.
Gari Lineker: “Pele vafot etdi. Futbolchilar ichida eng iqtidorlisi va odamlar ichida eng xushchaqchag‘i. U shunday futbol namoyish etganki, faqat tanlanganlardan bir nechasi unga yaqin kela olgan”.
Braziliyalik futbolchilarning deyarli barchasi mamlakat afsonasi bilan vidolashdi.
Ronaldo: “Sening davomching bo‘lish ulkan sharaf, do‘stim.
Sening iqtidoring — har bir futbolchi o‘rganishi kerak bo‘lgan maktab. Merosing avlodlar chegarasidan chiqib ketadi va buning evaziga sen umrbod yashaysan. Bugun va har doim biz meni qutlaymiz. Rahmat senga, Pele”.
Braziliya terma jamoasi va “Bunyodkor” sobiq hujumchisi Rivaldo: “Pele Braziliyada tug‘ilgani uchun yaratgandan minnatdorman. Uning maydondagi harakatlari sabab bizning futbol dunyoda nom qozondi va hech qachon unutilmaydi.
Ikkita Jahon Chempionatida uning tabarruk 10-raqami ostida to‘p surganimdan faxrlanaman. Qirol Pele, sizning merosingiz abadiy”.
Kazemiro: “Abadiy orom ol, Qirol Pele. Braziliya va futbolga bergan ulug‘vorlik uchun tashakkur. Sening merosing abadiy”.
Kafu: “Bugun akamni yo‘qotdim. U shunchaki foniy dunyoni tark etib, adog‘i yo‘q boqiy dunyoga ketdi. Ko‘rishamiz, Pele”.
Neymar ham juda chiroyli xayrlashdi: “Pelega qadar 10-raqam shunchaki son edi. Qachonlardir shunday deb o‘qigandim. Biroq bu ajoyib iqtibos to‘liq emas. Men Pelega qadar futbol oddiy sport edi, degan bo‘lardim. Pele hammasini o‘zgartirdi.
U futbolni san’at va ko‘ngilochar mashg‘ulotga aylantirdi. U qashshoq qoratanlilarning ovozi bo‘ldi. Yana bir muhim jihat: u butun dunyoga Braziliyani namoyish qildi. Futbol va Braziliyaning saviyasi Qirol sabab o‘sdi. U ketdi, biroq uning sehri qoladi. Pele abadiy!”.
Futbol klublari ham afsona bilan xayrlashdi.
“Real Madrid”: “Pelening oilasi, yaqinlari, klublari, Braziliya futbol konfederatsiyasi, mamlakat va dunyodagi barcha futbol ishqibozlariga hamdardlik bildiramiz.
Pele bu sportni sevgan barchaning yodida abadiy qoladi. Uning merosi Peleni futbol olamidagi eng buyuklardan biriga aylantiradi”.
“Paxtakor”: “Futbol qiroli Pelening vafoti munosabati bilan uning oilasi, do‘stlari va jahon futbol ahliga o‘z ta’ziyamizni izhor qilamiz. Futbolni sevishga chorlagan, o‘yinni o‘zgartirgan inson sifatida uning amalga oshirgan ishlari hech qachon unutilmaydi”.
“Arsenal”: “Pelening o‘limidan chuqur qayg‘udamiz. Klub sifatida 1981-yil uni “Hayberi”da qabul qilganimizdan g‘ururlanamiz. Biz butun umr qadrlaydigan xotira. Bizning xayolimiz bugun futbol hamjamiyati va Pelening yaqinlari bilan birga”.
“PSJ”: “Futbolning abadiy qiroli. Bu qayg‘uli vaqtda Pelening yaqinlari, oilasi va butun Braziliya xalqiga hamdardlik bildiramiz. Hammasi uchun rahmat”.
O‘FA ham bu voqeani e’tiborsiz qoldirmadi:
“O‘zbekiston futbol assotsiatsiyasi Pelening oila a’zolari, yaqinlari, Braziliya futbol konfederatsiyasi hamda butun dunyodagi barcha futbol muxlislariga hamdardlik bildiradi.
Pele haqidagi xotira ushbu sport turini sevuvchilarning qalbida abadiy qoladi va uning merosi, shubhasiz, jahon futbolining buyuk durdonalaridan biriga aylanadi”.
Nafaqat futbol olami, boshqa sportchilar ham Peleni so‘nggi yo‘lga kuzatmoqda.
Formula-1 bo‘yicha yetti karra jahon chempioni Lyuis Hemilton: “Bugun afsonani yo‘qotdik. O‘z iqtidoring, daholiging va sevgingni biz bilan bo‘lishganing uchun katta rahmat. Pelening merosi bizni abadiy ilhomlantiradi”.
Afsonaviy bokschi Mayk Tayson futbol qiroli bilan qanday tanishganini yodga oldi: “Yoshim 21 da edi, men buyuklar buyugi bilan uchrashishni orzu qilardim. Pele toza qalbli inson edi va boshqalar haqida hech qachon yomon gap gapirmasdi”.
Siyosiy arboblar ham chetda qolmadi.
AQSH prezidenti Jo Bayden: “Dunyoni birlashtiruvchi sport uchun Pelening kamtar havaskordan futbol afsonasi maqomigacha bosib o‘tgan yo‘li — imkoniyatlar haqidagi hikoya.
Bugun Jill (Baydenning rafiqasi — izoh “Daryo”) ikkimizning o‘y-xayollarimiz uning oilasi va Peleni yaxshi ko‘rgan barcha bilan birga”.
Fransiya prezidenti Emmanuel Makron: “O‘yin. Qirol. Abadiylik”.
AQSHning 44-prezidenti Barak Obama: “Pele futbol tarixidagi buyuk o‘yinchilardan biri edi. U sport odamlarni birlashtirish mumkinligini isbotladi”.
Mavzuga doir:
Izoh (0)