Yaponiyaning Nippon Steel kompaniyasi AQSHning po‘lat ishlab chiqaruvchi US Steel kompaniyasini sotib olishi bo‘yicha bitim prezident Jo Bayden tomonidan bloklandi.
US Steel direktori Devid Burrit Baydenning bu qarorini “sharmandali va siyosiy korrupsiya namunasi” deb atadi.
“Baydenning bugungi qarori sharmandali va korrupsiyalashgan. Bu uning kasaba uyushma rahbariga siyosiy to‘lovi, kompaniyamiz kelajagiga, xodimlarimiz va milliy xavfsizligimizga zarar yetkazadi. U milliy xavfsizlikdagi asosiy ittifoqchimiz Yaponiyani haqorat qildi, shuningdek, Amerikaning raqobatbardoshligini xavf ostigaqo‘ydi”, dedi u.
Kompaniya rahbari amerikalik ishchilar “bundan yaxshiroq prezidentga loyiq” ekaniga ishonchi komil.
“Bizga Amerika uchun qanday qilib eng yaxshi kelishuvga erishishni biladigan va unga erishish uchun ko‘p mehnat qiladigan prezident kerak. Biz Baydenning siyosiy korrupsiyasiga qarshi kurashmoqchimiz”, deya xulosa qildi US Steel rahbari.
Avvalroq Oq uy matbuot xizmati Jo Bayden Yaponiyaning Nippon Steel kompaniyasi tomonidan US Steel kompaniyasini sotib olish bo‘yicha kelishuvga to‘sqinlik qilgani haqida bayonot tarqatgan edi.
Amerika maʼmuriyati rahbarining taʼkidlashicha, milliy xavfsizlik va savdo bo‘yicha ekspertlarning “bu kelishuv Amerikaning eng yirik po‘lat kompaniyalaridan birining chet el nazoratiga o‘tishiga olib keladi va milliy xavfsizlik hamda asosiy taʼminot zanjirlariga tahdid soladi” deb hisoblagan baholari bunday qarorga sabab bo‘lgan.
Izoh (0)