Yaponiya moliya vaziri Shunichi Suzuki mamlakat hukumati Ukrainaga 4,5 milliard dollar (taxminan 650 milliard iyena) miqdorida qo‘shimcha moliyaviy yordam berishga tayyorligini ma’lum qildi. Bu haqda u G7 mamlakatlari markaziy banklari rahbarlari bilan uchrashuvda ma’lum qildi, deb yozadi Yaponiyaning Kyodo agentligi.
Yaponiya bosh vaziri Fumio Kisida 7-dekabr kuni G7 onlayn sammitida Ukrainaga mamlakatni tiklanishida yordam berish uchun moliyaviy yordam ko‘rsatish rejalari haqida gapirgandi. 15-dekabr kuni Yaponiya Vazirlar Mahkamasi vakili Shimasa Xayashi AQSHdan ko‘rsatilayotgan yordam hajmi kamaygan taqdirda, Kiyevga yordam ko‘rsatish imkoniyati haqida izoh berishdan bosh tortdi.
Ukraina bosh vaziri Denis Shmigal noyabr oyida mamlakat hukumati davlat budjeti taqchilligini qoplash uchun ittifoqchi davlatlardan 30 milliard dollardan ortiq mablag‘ olishga umid qilayotganini aytgan edi.
AQSH prezidenti Jo Bayden oktyabr oyida Ukraina uchun 61,4 milliard dollar va Isroil uchun 14,3 milliard dollar ajratish bo‘yicha Kongressga so‘rov yuborgan. Biroq moliyalashtirish loyihasi haligacha kelishib olinmagan. 15-dekabr kuni Vengriya bosh vaziri Viktor Orban Yevropa Ittifoqining Kiyevga 50 milliard yevro ajratish haqidagi qaroriga veto qo‘ygandi.
Izoh (0)