Yevropa Ittifoqi sudi milliarder Alisher Usmonovning sanksiyalar ro‘yxatidan olib tashlash haqidagi da’vosini rad etishga qaror qildi.
Ma’lum qilinishicha, Yevroittifoq sudi “VEB” rahbari va Rossiya bosh vazirining sobiq o‘rinbosari Igor Shuvalovga nisbatan sanksiyalarni ham bekor qilishdan bosh tortgan.
2022-yil fevralida Rossiyaning Ukrainaga bosqinidan so‘ng Alisher Usmonov boshqa ko‘plab rossiyalik tadbirkor va siyosatchilar singari Yevropa Ittifoqi, AQSH, Buyuk Britaniya, Yaponiya, Kanada, Avstraliya va boshqa davlatlar tomonidan sanksiyalarga uchradi. Qaror Usmonovning Rossiya prezidenti Putin bilan “yaqin aloqalari” va “Ukrainadagi beqarorlikni faol qo‘llab-quvvatlashi” bilan asoslandi.
Milliarder Alisher Usmonov bu da’volarga qarshi chiqdi va milliard dollarlik boyligi tufayli ro‘yxatga kiritilganini ta’kidladi.
Alisher Usmonov Putinning “biznes muammolarini hal qilgani” sudda oqlanmagan
Yanvar oyida Gamburg hududiy sudi Amerikaning Forbes jurnaliga Alisher Usmonov Rossiya prezidenti Vladimir Putinni “qo‘llab-quvvatlagani” va “uning biznes muammolarini hal qilgani” haqidagi bayonotlarni tarqatishni taqiqladi.
Tegishli da’voga 2022-yil 2-fevralda Forbes jurnalida chiqqan “Ukraina tufayli Bayden sanksiyalariga duchor bo‘lishi mumkin bo‘lgan Putin oligarxlari bilan tanishing” sarlavhali maqola sabab bo‘ldi. Shu sababli 2023-yil 27-fevralda maqola yuzasidan da’vo berildi.
Usmonovning himoyachisi maqolada asossiz iddaolar, ya’ni anonim ekspertning “Usmonov bir necha bor Putinni qo‘llab-quvvatlagan va biznesdagi muammolarini hal qilgan” degan iqtibosini o‘z ichiga olganini aytdi.
Sud jarayonida Forbes bayonot berilgan anonim manbani oshkor qilishdan bosh tortdi. Nashr, shuningdek, Usmonov qachon va qanday qilib Putinni “qo‘llab-quvvatlagani” yoki “biznes muammolarini hal qilgani” haqida misol keltira olmagan.
Izoh (0)