La Liganing 18-turi doirasida Madridning “Atletiko” klubi “Barselona” mehmoni bo‘ldi.
O‘yinning 30-daqiqasida Pedri hisobni ochdi. Oradan yana yarim soat o‘tib esa Rodrigo de Paul hisobni tenglashtirdi.
Bosh hakam tomonidan o‘yinga qo‘shib berilgan daqiqalar o‘tib borayotganda madridliklar qarshi hujumga qochib ketdi. Yakunda Aleksander Serlot darvozaga to‘p kiritib, jamoasi g‘alabasini taʼminladi.
“Barselona” bosh murabbiyi Xans-Diter Flik mag‘lubiyatga shunday izoh berdi:
“Biz ajoyib o‘yin ko‘rsatdik. Futbolchilarimning maydondagi harakatlaridan faxrlanaman. Biroq natija hayron qoldirdi. “Atletiko” o‘z imkoniyatini kutdi va ularga bu yetarli bo‘ldi. Bizda esa aksi bo‘ldi. Bugungi mag‘lubiyat juda ham alamli bo‘ldi. Biroq o‘yinchilarimning ko‘rsatgan o‘ynidan yaxshi maʼnoda hayratga tushdim”.
“Atletiko” bosh murabbiyi Diyego Simeone ham o‘z fikrlari bilan o‘rtoqlashdi.
“Futbolchilarimiz kurashga tayyor. Bizning eng katta kuchimiz birdamlikdir. Jamoa buni amalda isbotlamoqda. Zaxiradan maydonga tushgan futbolchilar o‘yinga yaxshi moslashishdi. Biz murabbiylar aynan shuni xohlaymiz. Biz barchaning bir safda bo‘lishini xohlaymiz.
“Real” va “Barselona” kabi monstrlarga qarshi kurash usulimiz shuki, butun jamoa tayyor bo‘lishi kerak.
“Barselona” yutqazgan barcha o‘yinlarida mag‘lubiyatga loyiq bo‘lmaganiga shubha qilmayman. Ular “Leganes” (0:1) va “Las-Palmas”ga (1:2) qarshi bahslarda ham ko‘p imkoniyatlarga ega bo‘lishgandi, ammo bu — futbol. To‘p darvozaga kirmasa, muammolar boshlanadi”, — deydi argentinalik mutaxassis.
Izoh (0)