Boku va Madrid shaharlari 2026/27-yilgi mavsum Chempionlar Ligasi finaliga mezbonlik qilmoqchi, deya xabar bermoqda UEFA.
Tashkilot Ozarbayjon va Ispaniya futbol federatsiyalaridan musobaqaning hal qiluvchi o‘yinini o‘zida o‘tkazish bo‘yicha arizalar qabul qilib olgan. Ozarbayjon finalni mamlakat poytaxtidagi Olimpiya stadionida o‘tkazishni rejalashtirgan, Ispaniya esa “Atletiko”ning uy stadionida finalni qabul qilmoqchi. Qayd etib o‘tish kerak, “Tottenhem” va “Liverpul” jamoalari ishtirokidagi 2018/19-yilgi final aynan shu stadionda bo‘lib o‘tgandi. Unda mersisaydliklar 2:0 hisobida g‘alaba qozongan.
Ayollar o‘rtasidagi 2027-yilgi Chempionlar Ligasi finalini esa Polsha (Varshava, Milliy stadion), Ispaniya (Barselona, “Kamp Nou”), Shveysariya (Bazel, “Sankt-Yakob Park”) va Uels (Kardiff, “Millenium”) kabilar o‘zida qabul qilmoqchi.
Rasmiy arizalar 2025-yilning 19-martiga qadar qabul qilinadi va shundan so‘ng may oyida final o‘tkaziladigan stadion nomi e’lon qilinadi.
Izoh (0)