Xalqaro jinoiy sud (XJS) prokurori Karim Xon Rossiya prezidenti Vladimir Putinni hibsga olishga order berish haqidagi qaror qanday qabul qilinganini gapirib berdi.
XJS 2023-yil mart oyida Putin va Rossiyadagi bolalar huquqlari bo‘yicha komissar Mariya Lvova-Belovani hibsga olish uchun order bergan edi. Ular Ukrainadagi urush paytida sodir etilgan harbiy jinoyatlarda gumon qilingan.
Moskva XJSning Putinni hibsga olishga order berish haqidagi qarorini qonuniy asossiz deb atagan. Rossiya Tergov qo‘mitasi XJS prokurori va sudyalariga qarshi jinoiy ish qo‘zg‘atgan, Putinning jinoiy javobgarlikka tortilishi “shubhasiz noqonuniy” ekanini aytgan.
Karim Xon Rossiyaning Ukrainaga bostirib kirishi unga boshqa tanlov qoldirmaganini ma’lum qilgan. Uning so‘zlariga ko‘ra, Ukraina tomoni undan 2021-yilda Ukraina bosh prokurori bilan uchrashganida Rossiyaning xatti-harakatlari yuzasidan tekshiruv o‘tkazishni so‘ragan. Prokurorning aytishicha, u Putinning Ukrainaga bostirib kirishga qaror qilishiga ishonmagan.
“Bu juda achinarli. Xavfsizlik Kengashining doimiy a’zosi, Rossiya — fashizm ustidan qozonilgan g‘alabada muhim rol o‘ynagan, BMTning asoschilaridan biri. Bu qaror menga hech qanday quvonch keltirmagan. BMT Xavfsizlik Kengashining muhim a’zosi Putinga qarshi hibsga olish uchun order berilishi qayg‘uli bo‘lgan”, deya davom etgan prokuror.
Rossiya Gaagadagi Xalqaro jinoiy sudni tan olmaydi va uning yurisdiksiyasiga amal qilmaydi. Ammo Vladimir Putin Rim statutini imzolagan hamda XJS buyruqlarini bajarishga, mamlakatlarga xalqaro safarlarni rad etishga majbur bo‘lgan. Putin 2023-yil iyul oyida garchi mamlakat rasmiylari uni hibsga olmasliklarini aytgan bo‘lsa-da, Janubiy Afrikadagi BRIKS sammitiga bormagan.
Avvalroq u Mongoliyaga tashrif buyurgan edi, u yerda Putin do‘stona kutib olingan.
Karim Xon Mangoliya nega XJS buyrug‘ini e’tiborsiz qoldirganini tushuntirishi kerakligini ta’kidlagan.
“Muzokara jarayoni sud doirasida davom etmoqda. Men hech narsani oldindan taxmin qilmoqchi emasman bu masala sudyalar va Mangoliya hukumati o‘rtasida hal qilinmoqda”, deydi u.
BBC’ning “Vladimir Putin qachondir Gaagadagi sud mahkamasiga tushishiga ishonasizmi?” degan savoliga Xon sobiq Yugoslaviya misolini keltirib javob bergan:
“Sobiq Yugoslaviya tribunali Karajich va Mladichni hibsga olishga order so‘raganida, Syerra-Leone bo‘yicha Maxsus sud sobiq prezident Charlz Teylorni hibsga olishga order berganida odamlar kulishgan edi, biroq o‘z mamlakatida va mintaqada katta hokimiyatga ega bo‘lgan bu odamlar oxir-oqibat sudlov mahkamasida o‘tirishdi”, deydi Karim Xon.
Hozirda XJS hibsga olmoqchi bo‘lgan eng yuqori martabali shaxslar Vladimir Putin, Isroil bosh vaziri Binyamin Netanyaxu va Isroil mudofaa vaziri Yoav Galantdir.
Xon, shuningdek, HAMASning uch nafar yetakchisini hibsga olish uchun order bergan, biroq ulardan ikkisi G‘azodagi harbiy harakatlarda halok bo‘lgan edi.
Izoh (0)