Kerch bo‘g‘ozida Rossiyaning yana bir “Volgoneft” tankeri 17-dekabrga o‘tar kechasi falokat signalini yubordi.
Kema bortida 4000 tonna mazut mavjud. Tanker 15-dekabr kuni ikkita shunga o‘xshash kema halokatga uchragan joyga yaqin bo‘lgan Kavkaz porti hududida turgan edi. “Volgoneft 109” tankeri kapitani yuk kemasining germetikligi buzilganligi va mazutning ballast tankiga oqayotganligi haqida ma’lum qildi. Unga ko‘ra, bunda kema korpusining yaxlitligi buzilmagan, neft mahsulotlari suvga sizib chiqmagan.
Kemada 14 nafar ekipaj a’zosi bor, ularning hayotiga hech qanday xavf yo‘q. Kapitan komandani evakuatsiya qilish taklifini qabul qilmadi, faqat langar tashlash joyini o‘zgartirishni so‘radi.
15-dekabr kuni Kerch bo‘g‘ozida mazut yuklangan ikkita “Volgoneft 212” va “Volgoneft 239” tankerlari shikastlangan edi. Ulardan biri cho‘kib ketgan, ikkinchisi Taman porti yaqinidagi qirg‘oqdan 18 m naridagi sayoz joyga to‘xtagan. Qutqaruvchilar ikkita kemadan 27 kishini evakuatsiya qilishdi, ammo ulardan biri — 23 yoshli vaxta matrosi halok bo‘lgan. Shifoxonalarga jami 11 kishi yotqizilgan, ulardan 2 nafari og‘ir ahvolda.
Tankerlar jami 9,2 ming tonna mazut tashigan. Hodisa oqibatida neft mahsulotlari to‘kilishi sodir bo‘ldi, Anapa va Krasnodar o‘lkasining bir qator aholi punktlarida favqulodda holat rejimi joriy etildi.
Mutaxassislar Mazutning sizib chiqishi Qora dengiz uchun eng katta ekologik falokatga aylanishi mumkinligidan ogohlantirdi. Dastlabki ma’lumotlarga ko‘ra, dengizga 4,2 ming kub metrdan ortiq neft mahsulotlari to‘kilgan bo‘lishi mumkin.
Izoh (0)