Rossiya hukumati harbiy-dengiz va yadroviy suvosti kemalarini Kubaga yuboradi. Bu haqda Kuba hukumati 6-iyun kuni eʼlon qilgan bayonotga asoslanib, CNN nashri xabar berdi.
Kuba rasmiylari Rossiya harbiy qismlari kelasi hafta boshida qabul qilinishini bildirgan. Rossiya kemalari “tarixiy do‘stona munosabatlar” doirasida Kubaga borishi aytilgan.
Kuba Tashqi ishlar vazirligi ham xabarni tasdiqlagan. Mamlakat inqilobiy qurolli kuchlari eʼlon qilgan bayonotga ko‘ra, Rossiyaning “Gorshkov” fregati, “Qozon” atom suvosti kemasi, “Pashin” flot neft tankeri va “Nikolay Chiker” qutqaruvchisi 12—17-iyun kunlari Gavana portiga tashrif buyuradi.
Kubaning rasmiylari kemalarning hech biri yadroviy qurolga ega emasligini bildirgan. Ularning Gavanada to‘xtab qolishi mintaqa uchun hech qanday tahdid yuzaga keltirmasligi taʼkidlangan.
Biroq bir qator G‘arb nashrlari Rossiya suvosti kemalari Kubaga yadroviy kallaklar olib borishi mumkinligini bildirgan. Ushbu holat Vashingtonga bosim o‘tkazish uchun amalga oshirilayotgani aytilgan.
“Boshqa mamlakatlar harbiy-dengiz kuchlarining tashrifi do‘stlik va hamkorlik aloqalarini saqlab qolgan xalqlar bilan inqilobiy hukumatning tarixiy amaliyotidir”, — deyiladi Kuba hukumati rasmiy bayonotda.
Moskva Kuba hukumati taqdim etgan maʼlumotni tasdiqlamagan. Kreml Kubaga kemalar yuborilishi bilan bog‘liq savollarni javobsiz qoldirgan.
Izoh (0)