Керч бўғозида Россиянинг яна бир “Волгонефть” танкери 17 декабрга ўтар кечаси фалокат сигналини юборди.
Кема бортида 4000 тонна мазут мавжуд. Танкер 15 декабрь куни иккита шунга ўхшаш кема ҳалокатга учраган жойга яқин бўлган Кавказ порти ҳудудида турган эди. “Волгонефть 109” танкери капитани юк кемасининг герметиклиги бузилганлиги ва мазутнинг балласт танкига оқаётганлиги ҳақида маълум қилди. Унга кўра, бунда кема корпусининг яхлитлиги бузилмаган, нефть маҳсулотлари сувга сизиб чиқмаган.
Кемада 14 нафар экипаж аъзоси бор, уларнинг ҳаётига ҳеч қандай хавф йўқ. Капитан командани эвакуация қилиш таклифини қабул қилмади, фақат лангар ташлаш жойини ўзгартиришни сўради.
15 декабрь куни Керч бўғозида мазут юкланган иккита “Волгонефть 212” ва “Волгонефть 239” танкерлари шикастланган эди. Улардан бири чўкиб кетган, иккинчиси Таман порти яқинидаги қирғоқдан 18 м наридаги саёз жойга тўхтаган. Қутқарувчилар иккита кемадан 27 кишини эвакуация қилишди, аммо улардан бири — 23 ёшли вахта матроси ҳалок бўлган. Шифохоналарга жами 11 киши ётқизилган, улардан 2 нафари оғир аҳволда.
Танкерлар жами 9,2 минг тонна мазут ташиган. Ҳодиса оқибатида нефть маҳсулотлари тўкилиши содир бўлди, Анапа ва Краснодар ўлкасининг бир қатор аҳоли пунктларида фавқулодда ҳолат режими жорий этилди.
Мутахассислар Мазутнинг сизиб чиқиши Қора денгиз учун энг катта экологик фалокатга айланиши мумкинлигидан огоҳлантирди. Дастлабки маълумотларга кўра, денгизга 4,2 минг куб метрдан ортиқ нефть маҳсулотлари тўкилган бўлиши мумкин.
Изоҳ (0)