Сурия Марказий банкининг омборхонасида деярли 26 тонна олтин сақланмоқда, аммо араб республикасининг янги ҳукумати унга кириш имкониятига эга эмас. Бу ҳақда Reuters хабар берди.
Мамлакатнинг олтин захираси ҳажми 2011 йилдан буён ўзгармаган. Қолган олтиннинг қиймати 2,2 миллиард долларга баҳоланмоқда. Жаҳон олтин кенгаши маълумотларига кўра, аввалроқ талончилар мамлакатдаги инқироздан фойдаланиб, Марказий банкнинг омборхоналаридан бирига кириб, Сурия фунтларини олиб кетган.
Бироқ қатъий хавфсизлик чоралари туфайли олтин захирасига кириш имконсиз бўлиб қолмоқда: унга кириш учун махсус код ва турли шахсларда сақланадиган учта калит талаб этилади. Бундан ташқари, омборхона бошқариладиган портлатиш уринишларидан ҳимояланган.
Асад Суриянинг 250 млн доллар пулини Москвага юборган — ФТ
Британиянинг Financial Times газетаси махфий ҳужжатларга таяниб, 2018-2019 йилларда Сурия Марказий банкидан Москвага пуллар жўнатилганини маълум қилди. Асад ҳукумати Москванинг Внуково аэропортига 250 миллион долларга тенг бўлган нақд доллар ва евро жўнатган — номинал қиймати 100 доллар ва 500 евроли купюраларнинг оғирлиги тахминан 2 тоннани ташкил этгани айтилмоқда. Пулларни етказиб бериш учун 21 та авиақатнов амалга оширилгани таъкидланган.
Бундан ташқари, Асад оиласи Россияда яширин равишда активлар, жумладан, элита кўчмас мулклар сотиб олган. Хусусан, улар Москва-Ситининг элита ҳудудида қиймати камида 40 миллион долларлик 19 та ҳашаматли квартира харид қилган.
Изоҳ (0)