Og‘ir surunkali kasallikni boshidan o‘tkazayotgan fuqarolarning subsidiya olish, murojaat yuborishdagi muammolarini bartaraf etishga qaratilgan zarur chora-tadbirlar xususida Senat tomonidan Sog‘liqni saqlash vazirligiga senator so‘rovi yuborildi. Bu haqda yuqori palata axborot xizmati xabar bermoqda.
Ta’kidlanishicha, surunkali kasallikning og‘ir turlaridan azob chekayotgan va alohida xonada yashashga muhtoj bo‘lgan shaxslarning subsidiya olishi bilan bog‘liq jarayonlarda Sog‘liqni saqlash vazirligiga ham qator vazifalar yuklatilgan.
Vazirlar Mahkamasining 2020-yil 25-martdagi 182-sonli qarorida surunkali kasallikning og‘ir turlaridan azob chekayotgan va alohida xonada yashashga muhtoj bo‘lgan shaxslar ro‘yxatini ishlab chiqish, normativ-huquqiy hujjat bilan tasdiqlash hamda jamoatchilikka e’lon qilish belgilangan, biroq mazkur ro‘yxatni ishlab chiqish hamda qabul qilish ishlari yakuniga yetkazilmagan.
Hududiy tibbiyot muassasalariga bemorlarning surunkali kasalliklari haqidagi ma’lumotlarni elektron tarzda kuzatib borish va ma’lumotlarni yangilash imkoniyatini yaratish lozim bo‘lsa-da, bemorlarning kasallik tarixini raqamlashtirishga yetarli e’tibor qaratilmagan, deyiladi senator so‘rovida.
Ma’lum qilinishicha, ushbu holatlar fuqarolarning adolatli e’tirozlariga, jumladan, og‘ir surunkali kasallikka chalingan shaxslarning subsidiya olish bilan bog‘liq muammolarga duch kelishiga va davlat organlari hamda tashkilotlariga murojaatlari ko‘payishiga sabab bo‘lgan. Oliy Majlis Senatiga joriy yilning o‘tgan 10 oyi davomida uy-joy masalasida 1137 ta murojaat kelib tushgan.
So‘rovda Sog‘liqni saqlash vazirligi ko‘tarilgan masalalar bo‘yicha o‘z rejalari haqida joriy yilning 17-dekabriga qadar asoslantirilgan tushuntirishlar berishi nazarda tutilgan.
Izoh (0)