Оғир сурункали касалликни бошидан ўтказаётган фуқароларнинг субсидия олиш, мурожаат юборишдаги муаммоларини бартараф этишга қаратилган зарур чора-тадбирлар хусусида Сенат томонидан Соғлиқни сақлаш вазирлигига сенатор сўрови юборилди. Бу ҳақда юқори палата ахборот хизмати хабар бермоқда.
Таъкидланишича, сурункали касалликнинг оғир турларидан азоб чекаётган ва алоҳида хонада яшашга муҳтож бўлган шахсларнинг субсидия олиши билан боғлиқ жараёнларда Соғлиқни сақлаш вазирлигига ҳам қатор вазифалар юклатилган.
Вазирлар Маҳкамасининг 2020 йил 25 мартдаги 182-сонли қарорида сурункали касалликнинг оғир турларидан азоб чекаётган ва алоҳида хонада яшашга муҳтож бўлган шахслар рўйхатини ишлаб чиқиш, норматив-ҳуқуқий ҳужжат билан тасдиқлаш ҳамда жамоатчиликка эълон қилиш белгиланган, бироқ мазкур рўйхатни ишлаб чиқиш ҳамда қабул қилиш ишлари якунига етказилмаган.
Ҳудудий тиббиёт муассасаларига беморларнинг сурункали касалликлари ҳақидаги маълумотларни электрон тарзда кузатиб бориш ва маълумотларни янгилаш имкониятини яратиш лозим бўлса-да, беморларнинг касаллик тарихини рақамлаштиришга етарли эътибор қаратилмаган, дейилади сенатор сўровида.
Маълум қилинишича, ушбу ҳолатлар фуқароларнинг адолатли эътирозларига, жумладан, оғир сурункали касалликка чалинган шахсларнинг субсидия олиш билан боғлиқ муаммоларга дуч келишига ва давлат органлари ҳамда ташкилотларига мурожаатлари кўпайишига сабаб бўлган. Олий Мажлис Сенатига жорий йилнинг ўтган 10 ойи давомида уй-жой масаласида 1137 та мурожаат келиб тушган.
Сўровда Соғлиқни сақлаш вазирлиги кўтарилган масалалар бўйича ўз режалари ҳақида жорий йилнинг 17 декабрига қадар асослантирилган тушунтиришлар бериши назарда тутилган.
Изоҳ (0)