Telegram messenjeridagi kanallarda Farg‘ona viloyatida yashovchi besh nafar farzandi bor ayolning uyi buzib yuborilgani aks etgan video tarqaldi. Holat jamoatchilik tomonidan keng muhokama qilinmoqda. “Daryo” muxbiri mazkur holatga oydinlik kiritish maqsadida hodisa tafsilotlarini o‘rgandi.
Ma’lum bo‘lishicha, voqea viloyatning Marg‘ilon shahridagi Yangi Marg‘ilon shaharchasi, “Yangiobod” mahalla fuqarolar yig‘inida sodir bo‘lgan. Uyi buzib tashlangani aytilayotgan ayol shu mahallada ro‘yxatda turuvchi, ammo ayrim sabablarga ko‘ra ijaradagi uyida yashab kelayotgan Muqaddasxon Xolmatova bo‘lgan.
Ayolning aytishicha, ushbu xonadon 2000-yildan boshlab turmush o‘rtog‘i va uning harakati bilan barpo etilgan.
Turmush o‘rtog‘im bilan 1995-yil turmush qurganmiz. Bu uyning o‘rni quruq yer edi. 2000-yilda shu yerdan uy qura boshladik. Turmush o‘rtog‘im eng kichik farzand bo‘lgani sabab, rahmatli qaynonam biz bilan 26 yil birga yashadi. Turmush o‘rtog‘im Toshkentga qatnar edi. Keyinchalik ko‘p siprtli ichimlik ichgani sabab, surunkali alkogolizm kasalligiga duchor bo‘ldi. Shu sabab xo‘jayinimni 2017-yil viloyat Narkologiya dispanseriga ro‘yxatga qo‘yib, majburiy davolay boshladik. Yiliga ikki marotaba davolanar edi, — deydi jurnalistlar bilan suhbatlashgan ayol.
Uyi buzib tashlangani aytilayotgan ayolga ko‘ra, u bu xonadonni 2020-yil tark etgan.
Xo‘jayinimdagi alkogolizm kasalligi shu darajada rivojlanib ketdiki, hatto nima qilayotganini ham bilmay, o‘zini boshqarolmay qoladigan darajaga yetdi. Menga va bolalariga pichoq va bolta ko‘tarib, zo‘ravonlik qilish darajasiga yetgach, voyaga yetmagan bolalarimni himoya qilish uchun xonadonimdan chiqib ketishga majbur bo‘ldim, — deydi jabrlanuvchi ekani aytilayotgan ayol.
Muqaddasxon Xolmatovaning aytishicha, eri va u qurgan uy qaynonasining nomida bo‘lgan. 2019-yili qaynonasi ushbu uyni Muqaddasxon Xolmatovaning turmush o‘rtog‘iga hadya sifatida bergan.
Men bolalarni olib uydan chiqib ketganimdan so‘ng, erimdan aliment talab qilib, shikoyat qilgandim. Shu sabab erimning akasi unga maslahat berib, onasi tomonidan hadya qilingan o‘zimizning uyimizni yana qaytarib onasining nomiga o‘tkazishga ko‘ndirgan. Ya’ni meni uyga da’vo qiladi deb, uyni yana qaynonam nomiga o‘tkazishgan. 2022-yil qaynonam og‘ir kasallik sabab, to‘rt oy yotib qolgan. Qaynog‘am shu payt qaynonamni uyiga olib ketib qaragan. Va g‘arazli niyati — uyni o‘z nomiga olishga erishgan. Qaynonam esa shu voqeadan so‘ng, bir oy o‘tib, vafot etgan, — deydi ayol.
Muqaddasxon Xolmatovaning bildirishicha, bu uy 2022-yilda sotuvga ham qo‘yilgan. Ammo ayol va uning besh nafar farzandi shu uyda ro‘yxatda turgani sabab, sotilmagan.
“Yangiobod” mahalla fuqarolar yig‘ini raisi Jahongir Yunusovning ma’lumot berishicha, Bahodir Xolmatov (uyni buzib tashlagani aytilayotgan fuqaro) marhum ukasi Farhod Xolmatovning bola-chaqasi va ayolini uyiga kiritmagan bo‘lsa-da, ukasining o‘g‘liga g‘amxo‘rlik qilishini aytgan. Marhumning qizlari ham borligiga esa e’tibor qaratmagan.
Uyi buzib tashlangani aytilayotgan ayolning jurnalistlarga gapirib berishicha, marhum turmush o‘rtog‘i joniga qasd qilishidan to‘rt kun oldin unga qo‘ng‘iroq qilib, akasi uyni nomiga o‘tkazib olib, qaytarib bermayotganini, shu sabab o‘zini biror nima qilib qo‘yishini aytgan.
Xo‘jaynim 2022-yilning 4-may kuni menga qo‘ng‘iroq qilib, yig‘lab kechirim so‘radi. “Ayasi mening vijdonim qiynalyapti, akam uyni qaytib bermayapti, bersa bolalarimni olib kelaman degandim. Telefon qilsam, telefonlarimni ko‘tarmayapti. Nima qilishni bilmayapman, o‘zimni biror nima qilib qo‘yaman”, degandi. Shu muloqotimizdan so‘ng, to‘rt kun o‘tgach, 8-may kuni erim o‘zini osib qo‘ydi, — deydi marhum Forhod Xolmatovning bevasi.
“Yangiobod” mahalla fuqarolar yig‘ini raisi Jahongir Yunusovning ta’kidlashicha, mazkur holat yuzasidan mahallada sayyor sud bo‘lib o‘tgan va Muqaddasxon Xolmatova hamda farzandlarini uyga majburiy tartibda kiritish bo‘yicha sud qarori qabul qilingan. Sud qarori Majburiy ijro byurosi xodimlari tomonidan 2023-yilning 14-noyabr kuni ijro etilishi belgilangan. Biroq, yakshanba kuni ayolning qaynog‘asi Bahodir Xolmatov noma’lum sabablarga ko‘ra uyni texnikalar yordamida buzdirib yuborgan. Ayni paytda uy yashash uchun yaroqsiz holag kelib qolgan.
“Daryo” jurnalisti ayolga tegishli ekani aytilayotgan uyni buzib tashlagan Bahodir Xolmatov bilan muloqot qilib, uning harakatiga izoh olishga urindi. Ammo Bahodir Xolmatov gaplashish imkoni bo‘lmadi.
“Daryo” voqealar rivojini kuzatishda davom etadi.
Izoh (0)