Qashqadaryo viloyatining Qarshi shahrida joylashgan “roddom”lardan biri tanqid qilinib, mazkur muassasada homilador ayollar shifoxona koridorida davolanishga majbur bo‘layotgani, “roddom”da davlat tomonidan berilishi lozim bo‘lgan dori-darmonlarni sotib olishga majbur qilishayotgani aytilgan xabarlar tarqaldi. Viloyat Sog‘liqni saqlash boshqarmasi mazkur holatga eʼtibor qaratdi.
“Aniqlanishicha, mazkur holat Qarshi shahar tug‘uruqxonasida emas, Qashqadaryo viloyati perinatal markazida tasvirga olingan. Viloyat perinatal markazida 200 davolash o‘rni bo‘lishiga qaramasdan bir kunda o‘rtacha 285-300 nafargacha bemorga tibbiy xizmat ko‘rsatilib, o‘rtacha 30-35 ta jarrohlik amaliyoti bajarilgan”, — deyiladi boshqarma axboroti avvalida.
Taʼkidlanishicha, Qarshi shahar tug‘uruqxonasi sanitariya meʼyorlari talablari asosida joriy zararsizlantirish tadbirlari amalga oshirilayotganligi sababli ikki kunga yopilgan bo‘lib, ushbu tug‘uruqxona bemorlariga viloyat perinatal markazida yordam ko‘rsatilmoqda.
“Shu sababli mana shunday murakkab sharoitda, ortiqcha yuklama bilan mehnat qilayotgan tibbiyot xodimlarini ‘toza o‘zidan ketgan’, ‘vallomat’, ‘o‘ziga xon, o‘ziga bek’ tarzida malomat qilish emas, balki fidoyilar deb atash o‘rinli bo‘ladi. Videotasvirda aks etgan, muolaja olayotgan bemor shifoxona koridorida emas, reanimatsiya bo‘limining bir qismidagi o‘ringa yotqizilgan va nazoratga olingan. Bu yerda bemorlarga bosqichma-bosqich tibbiy xizmat ko‘rsatiladi. Dori-darmon retseptlari masalasi ham yuqorida qayd etilgan ortiqcha yuklama bilan bog‘liq. Markazda bo‘lmagan dori-darmonlar bemorning yaqinlari tomonidan keltirilmoqda”, — deydi mazkur vaziyatga izoh bergan masʼullar.
Qo‘shimcha qilinishicha, viloyat perinatal markazining asosiy maqsadi viloyatda onalar va go‘daklar o‘limi holatlarini kamaytirish, sifatli ixtisoslashtirilgan, yuqori texnologiyali va tibbiy xizmatni ko‘rsatish, eʼtiborga loyiq homilador ayollarga hamda muddatiga yetmay, og‘ir tug‘ilgan chaqaloqlarga akusherlik va ginekologik yordamni o‘z vaqtida ko‘rsatishdan iborat.
“Aynan shu jihati bilan u boshqa tug‘uruq muassasalaridan farqlanadi, yaʼni bu yerga homilador ayollar odatdagi emas, muammoli vaziyatlarda keltiriladi. Muassasa faoliyatiga baho berilganida bu jihat alohida hisobga olinishi zarur. Ayni paytda viloyatimizda reproduktiv markaz, skrining markazi, shahar tug‘uruqxonasi, viloyat perinatal markazi, viloyat bolalar ko‘p tarmoqli tibbiyot markazi singari bir qator muassasalarni birlashtiradigan ‘Ona va bola’ klasteri qurilishi yakunlanmoqda. Prezidentimiz Shavkat Mirziyoyevning qashqadaryolik saylovchilar bilan uchrashuvida qayd etilganidek, kelgusida viloyatda jami 550 o‘rinli zamonaviy tug‘uruq komplekslari quriladi”, — deyiladi viloyat Sog‘liqni saqlash boshqarmasi axborotida.
Boshqarma axborot xizmati, shuningdek, bemorning (ayniqsa tug‘uruqxona sharoitida) ruxsatisiz uni videotasvirga olish va ijtimoiy tarmoqlarda bu tasvirlarni eʼlon qilish, shuningdek, asoslantirilmagan maʼlumotlarni tarqatish qonunga zid va tegishli tartibda javobgarlikka sabab bo‘lishini eslatib o‘tgan.
Izoh (0)