Toshkentdagi tug‘uruqxonada egizak chaqaloqlar vafot etgani haqida xabar berilgan edi. Sog‘liqni saqlash vazirligi holat tafsilotlarini ochiqladi.
Aniqlanishicha, bemor D.Sh. egizak homiladorlikning og‘ir asoratli kechishi tufayli poytaxtdagi 6-sonli tug‘uruq kompleksiga joriy yil uch marotaba (4-11-aprel, 29-may-5-iyun va 13-17-iyun kunlari) yotqizilgan va homilaning surunkali tushish xavfi bilan davolangan.
Ayolda homilani saqlash bo‘yicha olib borilgan statsionar va ambulator muolajalarga qaramay, 2023-yil 22-iyun kuni to‘rtinchi marotaba tez tibbiy yordam xizmati avtomashinasi orqali ushbu tug‘uruq muassasasiga shoshilinch ravishda olib kelingan.
Unga 1-homiladorlik. Egizak. Erta tug‘uruqning boshlanishi. Homila ichki infeksiyasi. Kam suvlik.” tashxisi qo‘yilgan. 22-iyun kuni soat 21:45 da ayolda erta tug‘uruq kuzatilgan. Asoratli tug‘uruq belgilari bilan og‘ir darajadagi chalalik, chuqur asfiksiya, sust yurak urishi bilan 660,0 gr, 33 sm. uzunlikdagi qiz jinsli chaqaloq tug‘ilgan. Biroq shifokorlar tomonidan o‘z vaqtida olib borilgan yurak-o‘pka reanimatsiyasi muolajalari samara bermagan.
Ikkinchi qiz jinsli o‘lik chaqaloq 15 daqiqadan so‘ng asoratli tug‘uruq belgilari bilan og‘ir darajadagi chalalik, o‘lik homilaning bachadonda ko‘ndalang joylashuvi, 560,0 gr, 31 sm uzunlik ko‘rsatkichlari bilan tug‘ilgan. Shundan so‘ng yo‘ldosh gistologiya tekshiruviga yuborilgan.
Bemor D.Sh.ning qarindoshlari tomonidan yozma ravishda imzolangan tilxatda tibbiyot xodimlariga eʼtirozi yo‘qligi va patanatomik tekshiruvga qarshiligi to‘g‘risidagi qatʼiy talabi tufayli o‘ta kam vaznli (660,0 va 560,0 gr) chaqaloqlarni patanatomik tekshiruvdan o‘tkazish imkoni bo‘lmadi. Ayol 2023-yil 23-iyun kuni qoniqarli ahvolda shifoxonadan chiqarilgan.
Kuni kecha Navoiy viloyati Xatirchi tumanidagi tibbiyot birlashmasida ayol tug‘uruqdan so‘ng vafot etgani to‘g‘risida xabar berilgandi. Undan oldin Toshkent viloyati Nurafshon shahridagi tug‘uruqxonada ayol chaqalog‘i bilan vafot etgan edi.
Izoh (0)