Parkentda bolalar maktabga jar yoqalab qatnayotgani aks etgan suratlar bo‘yicha rasmiy munosabat bildirildi

Toshkent viloyatining Parkent tumanida bolalar maktabga jar yoqalab qatnayotgani aks etgan suratlar ijtimoiy tarmoqlarda tarqalib, keskin muhokamalarga sabab bo‘ldi. Tuman hokimligi bunga munosabat bildirdi.

Unda aytilishicha, rasmlar tumanning Changi qishlog‘i “Nurobod” mahallasi Obisher ko‘chasida olingan. Ushbu ko‘chada 14 ta xonadon mavjud. Ko‘cha 2018-yilda tashkil etilgan. O‘quvchilar qiyinchilik bilan yurayotgan yo‘l mahalliy aholi tomonidan hashar yo‘li bilan qurilgan, ammo 2022-yil bahorida davomiy yog‘ingarchiliklar sababli yo‘lning katta qismiga jiddiy zarar yetgan.

Bu ko‘chadan 8 nafar maktab o‘quvchisi Hisorak qishlog‘ida joylashgan 29-umumta’lim maktabiga qatnashadi. Ushbu maktabga borish uchun muhokamalarga sabab bo‘lgan rasmlarda ko‘rsatilgan yo‘ldan tashqari, qo‘shimcha xavfsiz yo‘l ham mavjud. Obisher ko‘chasi bilan maktab orasidagi masofa 1,3 km ni tashkil etadi.

“Tuman hokimligi mutasaddilari ushbu yo‘l ichki yo‘llar balansiga kirmaganligi sababli loyiha-smeta asosida ichki yo‘llar balansiga kiritilishini hamda qurilish ishlariga malakali mutaxassislar jalb qilinishini, shunchaki shag‘al tashlash orqali muammoga uzil-kesil yechim topib bo‘lmasligi, yomg‘irli mavsumlarda bunday holatlar yana takrorlanishi mumkinligini ma’lum qiladi.

Qishloqdagi bu vaziyat tuman hokimligining to‘liq nazoratiga olingan va qurilish ishlari uchun loyihalashtirish ishlari boshlangan. 2022-yil so‘ngiga qadar bu masalaga ijobiy yechim topiladi”, — deyiladi xabarda.

Mavzuga doir: 

• Qashqadaryoda “roddom”ga ketayotgan ayollar ham yurak hovuchlab o‘tishga majbur bo‘lgan osma ko‘prik yangilandi
• Andijondagi “Alvasti ko‘prik” o‘rnida yangi ko‘prik foydalanishga topshirildi