Amerika texnologiya giganti Apple, sun’iy intellekt (SI) xususiyatlarini smartfon va boshqa qurilmalarining ajralmas qismiga aylantirishni maqsad qilgan, deya Deutsche Welle xabar berdi.
Xabarga ko‘ra, Apple SI sohasidagi yetakchi hisoblangan OpenAI kompaniyasi bilan hamkorlikda Apple Intelligence (AI) tizimini yaratmoqda.
Dunyo bo‘ylab dasturchilar konferensiyasida Apple qurilmalari uchun mo‘ljallangan yangi operatsion tizimlarni ishga tushirish, jumladan, iOS 18, iPad OS 18 va MacOS Sequoia operatsion tizimlarining sun’iy intellekt asosidagi yangi funksiyalari taqdim etilgan.
OpenAI bilan hamkorlik doirasida, ChatGPT chatboti — matn yaratish, tasvirlar va boshqa kontentni generatsiya qilishga qodir bo‘lgan texnologiyalar iPhone, iPad va boshqa Apple qurilmalariga ham o‘rnatiladi.
Yangi iPhone’lar funksiyalari va xususiyatlari
Xususan, Apple Intelligence avtomatik matn yozish, ilovalar bo‘yicha axborotni jamlash, elektron pochta xabarlarini qabul qilish va xususiy emojilarni yaratish imkoniyatiga ega bo‘ladi. Siri ovozli yordamchisi ham SI texnologiyasi yordamida to‘liq qayta ishlanadi. Shuningdek, ma’lumotlar himoyasini ta’minlaydigan mexanizmlar Apple Intelligence bilan birlashtiriladi.
OpenAI bosh direktori Sem Altmanga ko‘ra, uning kompaniyasi bu yil Apple bilan ChatGPT’ni o‘z qurilmalariga integratsiya qilish ustida hamkorlik qilishdan mamnun. Apple bosh direktori Tim Kuk sun’iy intellekt sohasidagi eng so‘nggi yutuqlar foydalanuvchilarning Apple mahsulotlaridan foydalanish tajribasini yangi darajaga ko‘tarishini ta’kidlagan. Shu kunga qadar korporatsiya sun’iy intellektdan foydalanishda raqiblari, jumladan, Google va Microsoft’dan ancha ortda qolgan edi.
Izoh (0)