Apple Yevropa Ittifoqining raqamli bozorlar bo‘yicha qonunini buzganlikda ayblanmoqda

Yevropa Komissiyasi Amerikaning Apple Inc kompaniyasini App Store do‘konidagi raqobatni cheklashda aybladi. 

YK press-reliziga ko‘ra, regulyator Apple yangi Raqamli bozorlar to‘g‘risidagi qonun (DMA — Digital Markets Act) bo‘yicha o‘z majburiyatlarini bajarmayotganini aniqlagan. Unga ko‘ra kompaniya dastur ishlab chiquvchilarga foydalanuvchilardan haq olmasdan tashqi resurslarga “yo‘naltirish” imkoniyatini berishi kerak.

Apple DMA bo‘yicha ayb qo‘yilgan birinchi kompaniya bo‘ldi.

Yevropa Komissiyasi Apple tomonidan ilovalarni ishlab chiquvchilardan foydalanuvchilarni App Store orqali jalb qilish uchun olinadigan to‘lovlarni “zaruratsiz” deb atadi.

Regulyator, shuningdek, kompaniyaga nisbatan yangi tergov boshladi, uning bir qismi sifatida u uchinchi tomon ilovalari va ilova do‘konlarini yuklab olish bo‘yicha siyosati DMAga mos keladimi yoki yo‘qligini tekshirmoqda.

Agar kompaniya DMAni buzganlikda aybdor deb topilsa, u global daromadning 10 foizigacha jarimaga tortiladi.