O‘zbekistonda yangidan shakllangan Senat tarkibi ma’lum qilindi

Markaziy saylov komissiyasi Oliy Majlis Senati a’zolari ro‘yxatga olinganini e’lon qildi.

Ma’lum qilinishicha, prezidentning 14-noyabrdagi farmoniga asosan tayinlangan Oliy Majlis Senati a’zolari ro‘yxatga olindi. Shavkat Mirziyoyev farmoni bilan quyidagi 9 kishi senator etib tayinlangandi: 

• Ziyo Azamat Hamid o‘g‘li– Fanlar akademiyasi Tarix instituti direktori;
• Yo‘lchiyeva Munojatxon Abduvaliyevna – Yunus Rajabiy nomidagi O‘zbek milliy musiqa san’ati instituti professori;
• Ko‘chimov Abdusaid Ko‘chimovich – O‘zbekiston Milliy axborot agentligi bosh direktori;
• Rafiqov Qudratilla Mirsagatovich– Kasaba uyushmalari federatsiyasi kengashi raisi
• Raxmankulov Mir-Akbar Xodji-Akbarovich– Prezident huzuridagi Qonunchilik va huquqiy siyosat instituti direktori;
• Safoyev Sodiq Solixovich– Oliy Majlis Senati raisi birinchi o‘rinbosari;
• Sa’dullayev Alisher Zafar o‘g‘li – Yoshlar ishlari agentligi direktori;
• Turdiyev Sodiqjon – O‘zbekiston faxriylarining ijtimoiy faoliyatini qo‘llab-quvvatlash “Nuroniy” jamg‘armasi boshqaruvi raisi;
• Xudaybergenov Tursinxan Aydarovich – prezident maslahatchisi.

Shuningdek, 7—12-noyabr kunlari Oliy Majlis Senati a’zolarini saylash bo‘yicha o‘tkazilgan mahalliy Kengashlarning qo‘shma majlislari bayonnomalari muhokama qilinib, ular asosida Oliy Majlis Senati a’zolarini ro‘yxatga olish to‘g‘risida tegishli qaror qabul qilindi.

Unga ko‘ra, hududlardan jami 51 nafar senator saylandi. Qoraqalpog‘iston Respublikasi Jo‘qorg‘i Kengesi raisi, viloyatlar va Toshkent shahar hokimlari ham senator bo‘ldi.

Yangidan shakllangan Senatning sifat tarkibi quyidagicha

• senatorlarning 26,4 foizini xotin-qizlar tashkil etdi;
• 1 nafari – 30 yosh, 41,6 foizi – 40 yoshdan 60 yoshgacha, 56,6 foizi – 60 yoshdan kattalarni tashkil etdi;
• 98,3 foizi oliy ma’lumotli bo‘lib, 31,6 foizi ilmiy darajaga ega;

Senatorlarning 25 foizi – iqtisodchilar, 13,3 foizi – huquqshunoslar, 26,6 foizi – pedagoglar, 13,3 foizi – muhandislar, 5 foizi – tibbiyot sohasi vakillari, 16,8 foizini esa – madaniyat sohasi vakillari, tadbirkor va fermerlar tashkil etadi.

Hududlardan saylangan senatorlar to‘liq ro‘yxati bilan quyidagi havola orqali tanishish mumkin.

Markaziy saylov komissiyasi matbuot xizmatining xabar qilishicha, 2024-yil 18-noyabr kuni Qonunchilik palatasining va 2024-yil 19-noyabr kuni Senatning birinchi majlislarini Toshkent shahrida chaqirilishi belgilandi.

Oliy Majlis Senati haqida

Senat mamlakatning asosiy vakillik organi bo‘lib, ijtimoiy-siyosiy va davlat-mintaqaviy vakillikni ifoda etadi. Qonun chiqaruvchi oliy organni shakllantirish va uning bundan keyingi faoliyatining o‘zgarmas prinsipi huquq va qonun ustunligini hamda hokimiyatning hamma tarmoqlari aniq chegaralanishi hamda muvozanatda bo‘lishini taʼminlashdan iborat.

Konstitutsiyaga va konstitutsiyaviy qonunlarga, boshqa huquqiy hujjatlarga muvofiq, Senat tarkibini shakllantirishda, birinchidan, hududiy vakillik organlari senatorlarni saylash vositasida, ikkinchidan esa, O‘zbekiston Respublikasi prezidenti farmoni bilan 9 nafar senatorni tayinlash yo‘li bilan bevosita ishtirok etadi. Yuqori palataning aʼzosini saylash Saylov kodeksi bilan tartibga solinadi.

Yangilangan Konstitutsiyaga ko‘ra, endilikda senatorlar soni 65 nafarni tashkil etadi. Ular Qoraqalpog‘iston, viloyatlar va Toshkent shahridan teng miqdorda — 4 nafardan (ilgari 6 nafardan) saylanadi. Senatning yana 9 nafar a’zosi (ilgari 16) fan, san’at, adabiyot, ishlab chiqarish hamda davlat va jamiyat faoliyatining boshqa sohalarida katta amaliy tajribaga ega bo‘lgan eng obro‘li fuqarolar orasidan prezident tomonidan tayinlanadi.

Saylov kuni 25 yoshga to‘lgan hamda kamida 5 yil O‘zbekiston hududida muqim yashayotgan O‘zbekiston fuqarosi Oliy Majlisining Qonunchilik palatasi deputati, shuningdek, Senat aʼzosi bo‘lishi mumkin. Ayni bir shaxs bir paytning o‘zida Qonunchilik palatasi deputati va Senat aʼzosi bo‘lishi mumkin emas.