Namangan viloyati Chust tumani xalq deputatlari Kengashi deputati o‘ziga berilgan vakolatdan foydalanib, davlat tomonidan kutubxona qurish uchun ajratilgan yerni tadbirkorga sotishga urindi. Bu haqda “Bu kun” informatsion dasturida ma’lum qilindi.
Qayd etilishicha, 17-may kuni Chust tumanida yashovchi fuqaro Namangan viloyati IIB boshlig‘i nomiga ariza bilan murojaat qilgan. Uning ma’lum qilishicha, shu yilning may oyi o‘rtalarida Pop tumani hududida alyuminiy eshik-rom sexi tashkil etish uchun bo‘sh yer maydoni izlab yurganida, tuman xalq deputatlari kengashi deputati vazifasida ishlovchi shaxs bilan tanishib qolgan. U fuqaroga Pop shahri markazida o‘ziga tegishli bo‘lgan sobiq tuman kutubxonasining 4 sotixli bo‘sh yer maydoni borligi va ushbu yerni 35 ming AQSH dollariga sotishini aytgan.
Shuningdek, deputat 10 ming AQSH dollari evaziga tuman kadastr palatasida ishlovchi tanishi orqali yer hujjatlarini rasmiylashtirib berishni va’da qilgan.
Arizaga asosan shu kuni viloyat IIB Tezkor-qidiruv xizmati Jinoyat-qidiruv boshqarmasi Korrupsiya va iqtisodiy jinoyatlarga qarshi kurashish bo‘limi, DXX Namangan viloyati boshqarmasi xodimlari hamkorligida tezkor tadbir o‘tkazilgan. Tadbirda arizada nomi keltirilgan shaxs kimyoviy ishlov berilgan 10 ming dollarni olib, unga yer maydoniga tegishli bo‘lgan qaror nusxasini berganida ushlangan.
Tergovga qadar tekshiruv davomida mazkur yer maydoni deputatga kutubxona qurish uchun berilgani ma’lum bo‘lgan. Holat yuzasidan Pop tuman IIB tomonidan Jinoyat kodeksining 168-moddasi (firibgarlik) 4-qismi bilan jinoyat ishlari qo‘zg‘atilib, tergov harakatlari olib borilmoqda.
Noqonuniy yer savdolari
Aprel boshlarida Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgan edi.
Izoh (0)