Xitoylik va amerikalik olimlar shunday qurilish materiali yaratdilarki, u yorug‘lik va issiqlik bilan o‘zaro ta’sirlashib, oddiy sement va betondan farqli ravishda binolarda issiqlik to‘planishiga emas, balki ularning sovishiga yordam beradi. Tadqiqot natijalari Science Advances ilmiy jurnalida chop etildi.
Yangi aralashmani qo‘llash kunduzgi jazirama paytida bino ichidagi haroratni 5 daraja Selsiyga pasaytirish imkonini beradi.
“Bu sement qotganda uning yuzasida tabiiy ettringit mineralining kristallariga o‘xshash maxsus tuzilma hosil bo‘ladi. U bir vaqtning o‘zida ko‘rinadigan yorug‘likni yaxshi aks ettiradi va shu bilan birga o‘rta infraqizil nurlanishni deyarli to‘liq o‘tkazadi. Bu bizga kunduzgi jaziramaga o‘xshash sharoitda bino ichidagi haroratni 5 daraja Selsiyga pasaytirish imkonini berdi”, deydi tadqiqotchilar.
Olimlar “foton-strukturalangan sement” deb nomlagan material Xitoy Xalq Respublikasining Janubi-Sharqiy universiteti professori Miao Chanven rahbarligidagi xitoylik va amerikalik materialshunoslar guruhi tomonidan yaratilgan. Ularning ishlanmasi klassik sementning asosiy kamchiliklaridan birini bartaraf etishga qaratilgan. Bu kamchilik sementni tropik va issiq mamlakatlarda qo‘llashga to‘sqinlik qiladi, chunki uning asosidagi qurilish materiallari quyosh nuri va issiqligining atigi 30 foizini aks ettiradi.
Olimlar oddiy va “foton-strukturalangan sement”dan uyning kichik modellarini yasab, ularning quyosh nuri va issiqlikka bo‘lgan reaksiyasini kuzatishgan. Ushbu tajribalar shuni ko‘rsatdiki, yangi material kunning eng issiq soatlarida uy devorlarining qizishini 60-70 darajadan 30-35 daraja Selsiygacha kamaytirgan. Natijada bino ichidagi harorat 5 darajaga pasaygan.
“Kelajakda bu uylarni sovitish xarajatlarini sezilarli darajada kamaytirish imkonini beradi”, deyiladi maqolada.
Izoh (0)