O‘zbekistonda korrupsiya haqida xabar berganlarga himoya choralari belgilanmoqda

“Korrupsiyaga oid huquqbuzarlik haqida xabar bergan shaxslarni himoya qilish to‘g‘risida”gi qonun loyihasi ishlab chiqildi.

Qonun loyihasida huquqbuzarlik haqida xabar bergan shaxslarning himoyasini ta’minlovchi, vakolatli shaxslar hamda organlarning huquq va majburiyatlari, xabar bergan shaxslarni himoya qilishni ta’minlashga oid qarorlari ijro etilishi majburiyligi, xabar bergan shaxslarni moliyaviy va moddiy-texnik ta’minlash himoya choralari belgilanmoqda.

Xabar beruvchiga quyidagilar kafolatlanmoqda:

• xabar beruvchining hayoti, sog‘lig‘i, shaxsiy va ishchanlik obro‘si hamda mol-mulkining himoya qilinishi;
• xabar beruvchining shaxsiga oid ma’lumotlar yoki boshqa sir tutilishi zarur bo‘lgan ma’lumotlarning uchinchi shaxslarga oshkor qilinmasligi;
• zarur huquqiy yordam bilan ta’minlanishi;
• xabar beruvchidan qasd olishga qaratilgan harakatlar, shu jumladan uni noqonuniy ta’qib qilish va jazolashga yo‘l qo‘ymaslik;
• xabar berganligi tufayli ishdan bo‘shatish, lavozimini pasaytirish, kamsitish, bosim o‘tkazish va boshqa shakllarda ta’qib qilinishiga yo‘l qo‘yilmasligining ta’minlashishi.

Shuningdek, xabar beruvchi yaqin qarindoshlariga nisbatan himoya choralarini qo‘llashni talab qilish, davlat organlarining qarorlari, mansabdorlarning harakatlari (harakatsizligi), mehnat qonunchiligi buzilishi ustidan shikoyat qilish huquqiga ega bo‘ladi.

Himoya qilishni ta’minlash to‘g‘risidagi qaror antikorrupsiya agentligi, tezkor-qidiruv faoliyatini amalga oshiruvchi organlar, tergovga qadar tekshiruv organlari, surishtiruv organlari, dastlabki tergov organlari, prokuratura organlari va sud tomonidan qabul qilinadi.

Ta’qib va zo‘ravonlik holatlari haqida xavfsirash uchun yetarli asoslar bo‘lganida xabar beruvchiga himoya choralarini ta’minlovchi davlat organlari tomonidan himoya orderi beriladi.

Xabar beruvchilarning xavfsizligi IIV, DXX, Milliy gvardiya va ularning hududiy organlari tomonidan ta’minlanadi.