IIV Tezkor-qidiruv departamenti tomonidan qishloq xo‘jaligi mahsulotlarini chet elga eksport qiluvchi tadbirkorlardan badal to‘lashni talab qilib kelgan jinoiy guruh qo‘lga olindi.
Qayd etilishicha, Farg‘ona viloyati Marg‘ilon shahrida ro‘yxatdan o‘tgan MCHJ mas’ul xodimlari 2018-yildan buyon Moskvada faoliyat yurituvchi tashkilot vakillari eksport tariqasida yuborilayotgan qishloq xo‘jaligi mahsulotlarining har bir kilogrammidan olingan foyda hisobidan 40 sentdan badal to‘lashni tayinlab, turli tazyiqlar o‘tkazib kelayotganliklarini ma’lum qilgan.
Mazkur guruh may oyining uchinchi haftasi davomida Rossiyaga yuborilgan mahsulotlardan kelib tushgan foydadan jami 15 126 AQSH dollari miqdorida pul talab qilgan.
23-may kuni IIV Tezkor-qidiruv departamenti JQX Korrupsiya va iqtisodiy jinoyatlarga qarshi kurashish boshqarmasi xodimlari tomonidan o‘tkazilgan tadbirda Toshkent shahar Olmazor tumanida joylashgan restoranda talab qilingan pullarni tovlamachilik yo‘li bilan olgan gumonlanuvchilar qo‘lga olingan.
Holat yuzasidan Jinoyat kodeksining 165-moddasi (tovlamachilik) 3-qismi “a” bandi bilan jinoyat ishi qo‘zg‘atilib, gumonlanuvchilar qamoqqa olingan.
Aprel oxirlarida Toshkent viloyati IIBB Tezkor-qidiruv xizmati va DXX xodimlari tomonidan qarz evaziga berilgan pullardan foiz sifatida 1 000 AQSH dollarini tovlamachilik yo‘li bilan talab qilgan jinoiy guruh qo‘lga olingandi.
Izoh (0)