Bugun, 21-avgust kuni Xitoyning sun’iy intellekt startapi DeepSeek o‘zining flagman modeli V3 ning yangilangan versiyasini chiqardi. Model Xitoy chiplariga optimallashtirilgan va yuqori tezlikda ishlash imkonini beradi. Bu haqda Reuters agentligi xabar berdi.
Kompaniyaning WeChat’dagi xabarida aytilishicha, yangi DeepSeek-V3.1 modeli UE8M0 FP8 aniqlik formatiga ega bo‘lib, u tez orada chiqarilishi kutilayotgan yangi avlod mahalliy chiplar bilan ishlash uchun ishlab chiqilgan. DeepSeek bu moslik funksiyasi qaysi chip modellari yoki ishlab chiqaruvchilarini qo‘llab-quvvatlashini aniqlamagan.
Qayd etilishicha, bu DeepSeek modelining so‘nggi oylar ichida uchinchi yangilanishi bo‘ldi. May oyida R1 modeli yangilangan, mart oyida esa V3 takomillashtirilgandi.
Mahalliy chiplar bilan moslikka e’tibor qaratilishi DeepSeek o‘zining sun’iy intellekt modellarini Xitoyning tobora rivojlanib borayotgan yarimo‘tkazgich ekotizimiga moslashtirayotganidan dalolat beradi. Chunki Pekin Vashingtonning eksport cheklovlari fonida Amerika texnologiyalariga muqobil ishlab chiqishni kuchaytirmoqda.
Izoh (0)