Samarqand viloyatida noqonuniy ravishda elektr tarmog‘iga ulanib, davlat va jamiyat manfaatiga 2 milliard 237 million so‘m zarar yetkazgan shaxs aniqlandi. Bu haqda viloyat IIB axborot xizmati xabar berdi.
Qayd etilishicha, holat 12-dekabr kuni Samarqand viloyati IIB TQX JQB Korrupsiya va iqtisodiy jinoyatlarga qarshi kurashish bo‘limi, Kiberxavfsizlik bo‘limi, DXX viloyati boshqarmasi, viloyat prokuraturasi, departamentning viloyat boshqarmasi va “O‘zenergoinspeksiya” viloyat boshqarmasi hamkorligida o‘tkazilgan tezkor tadbir davomida aniqlangan.
1990-yilda tug‘ilgan X.A. Past Darg‘om tumani “Kamolot” mahallasida joylashgan noturar bino yerto‘lasida elektr tarmog‘iga yashirin ravishda ulangan holda 25 dona mayning uskunasini o‘rnatib, noqonuniy ravishda davlat va jamiyat manfaatiga 2 milliard 237 million so‘m zarar yetkazgan.
Mazkur holat yuzasidan tergovga qadar tekshirish harakatlari olib borilmoqda. Bu kabi noqonuniy faoliyatlarga chek qo‘yish borasidagi tadbirlar davom etmoqda.
Izoh (0)