Qozog‘iston Respublikasi Jambil viloyati Taras shahridagi xonadonlarning birida ikki ayolning jasadi topilgan. Bu haqda KTK telekanali sayti xabar berdi.
Ma’lumotlarga ko‘ra, jasadlar Tarasning gavjum tumanlaridan biridagi ko‘p qavatli uydan topilgan. Halok bo‘lganlar 46 va 54 yoshda bo‘lib, ulardan biri Olmaotadan Tarasga kelgan.
Qo‘shnilarning aytishicha, ayollar taxminan bir yildan beri ijarada yashab kelgan, xushmuomala bo‘lishgan va hech qachon shikoyatlarga sabab bo‘lmagan. Ammo ularni kim va nima uchun shunday vahshiyona o‘ldirganini hech kim bilmaydi. Hozirda qotillik sodir etilgan joy muhrlangan, politsiya esa jinoyatchini topishga harakat qilmoqda.
“Qotillik holati bo‘yicha sud oldidan tergov boshlandi. Voqea joyiga tezkor-tergov guruhi va Jambil viloyati politsiya departamenti rahbariyati yetib borgan. Gumon qilinuvchini aniqlash va qo‘lga olish uchun barcha zarur tergov-tezkor choralar ko‘rilmoqda. Qozog‘iston Respublikasi Jinoyat-protsessual kodeksining 201-moddasiga ko‘ra, boshqa ma’lumotlar oshkor qilinmaydi”, deydi politsiya.
Ma’lumot uchun, Qozog‘iston Respublikasi Jinoyat kodeksining 99-moddasiga ko‘ra, qotillik uchun 8 yildan boshlab umrbod ozodlikdan mahrum qilish jazosi tayinlanadi. Shuningdek, jinoyatchi muayyan lavozimlarni egallash yoki muayyan faoliyat bilan shug‘ullanish huquqidan umrbod mahrum etilishi va mol-mulki musodara qilinishi mumkin.
Izoh (0)