Qozog‘istonda deputat Karakat Abden ayollar uchun ish soatini qisqartirishni taklif qildi. U mazkur chora bolalar tarbiyasi va oilani mustahkamlashga ko‘proq vaqt ajratishga yordam berishini aytdi. Bu haqda Arbat.media xabar berdi.
Abdenning ta’kidlashicha, Qozog‘istonda ayollar liderligini qo‘llab-quvvatlashga qaratilgan sa’y-harakatlarga qaramay, sohada tizimli o‘zgarishlar yo‘q. U mamlakat prezidenti Qosim Jo‘mart To‘qayevning “gender tengligi — bu shunchaki maqsad emas, balki hayotda aks etishi kerak bo‘lgan tamoyil” degan so‘zlarini iqtibos keltirdi.
Takliflar orasida gender tengligi va gender kvotalarning bajarilishini kuzatish hamda hisob berish uchun milliy monitoring tizimini yaratish ham bor. Deputat ayollarni rahbarlik lavozimlariga tayinlashda ularning faqatgina professional fazilatlari va malakalariga e’tibor qaratish zarurligini ta’kidladi.
Bundan tashqari Abden davlat xizmati va kvazidavlat sektorining barcha darajalarida ayollar liderligini rivojlantirishga qaratilgan milliy dasturlarni ishga tushirishni ilgari surdi. U Skandinaviya mamlakatlari tajribasidan kelib chiqib, ish va oilaviy majburiyatlar o‘rtasidagi muvozanatni ta’minlash uchun ayollarga ish kunini qisqartirish foydali bo‘lishini aytdi. Deputat ayollar liderligini qo‘llab-quvvatlash maqsadida tun-u kun ishlaydigan bolalar bog‘chalari, ish joylarida bolalar xonalarini tashkil etishni hamda pullik dekret ta’tilini ikki yilgacha uzaytirishni taklif qilmoqda.
Avvalroq Mehnat va ijtimoiy himoya vaziri Svetlana Jakupova ham qozog‘istonliklar uchun ish kunini qisqartirish masalasini ko‘targandi. Bu masala ayniqsa vaqt o‘zgarishi va kunduzgi yorug‘lik vaqtining qisqarishi bilan bog‘liq. Qozog‘iston Mehnat kodeksi allaqachon ayrim toifalar uchun qisqartirilgan ish vaqtini nazarda tutadi, jumladan voyaga yetmaganlar, zararli sharoitda ishlovchilar va imkoniyati cheklanganlar uchun.
Izoh (0)