Rossiya Qurolli kuchlarida xizmat qilish uchun yillik shartnoma tuzgan migrantlarga soddalashtirilgan tartibda fuqarolik beriladi

Moskvadagi “Saxarovo” migratsiya bandlik markazida Rossiya Mudofaa vazirligiga xorijliklarning harbiy xizmatga kirishini tashkil etishda yordam berish uchun infratuzilma yo‘lga qo‘yiladi. Bu haqda poytaxt meri Sergey Sobyanin ma’lum qildi.

“Yaqin kelajakda Moskva hukumati Rossiya Mudofaa vazirligiga xorijiy fuqarolarning harbiy xizmatga kirishini tashkil qilishda yordam berish uchun Saxarovoda to‘liq infratuzilma yaratadi”, — deydi u. Sobyaninning qo‘shimcha qilishicha, shartnomalarni tuzish jarayoni xorijliklar uchun imkon qadar qulay tarzda amalga oshiriladi.

Sobyanin, shuningdek, Davlat dumasi qonun qabul qilganini qo‘shimcha qildi, unga ko‘ra, Rossiya Qurolli kuchlarida xizmat qilish uchun yillik shartnoma tuzgan xorijliklar soddalashtirilgan tartibda Rossiya fuqaroligini olishlari mumkin.

Ushbu o‘zgarish xorijiy harbiy xizmatchilarga yashash ruxsatnomasi olmasdan, shuningdek, yashash uchun ruxsatnoma olgan kundan boshlab besh yil davomida Rossiyada doimiy yashash shartisiz mamlakat fuqaroligini olish uchun ariza topshirish imkonini beradi.

Amaldagi qonunchilikka ko‘ra, harbiy shartnoma bo‘yicha kamida uch yil xizmat qilish kerak edi. Shuningdek, harbiy xizmatga askar, dengizchi hamda serjant sifatida kirayotgan xorijlik tomonidan Mudofaa vazirligi bilan tuzilishi mumkin bo‘lgan birinchi shartnoma muddati ham bir yilga qisqartiriladi.

Iqtisodchi Otabek Bakirov ushbu voqealar fonida o‘z shaxsiy fikrlarini yozib qoldirdi.

Uchta yomon xabar va, afsuski, ularning hammasi bir-birini to‘ldiradi.

Birinchi yomon xabar. Rossiya Jinoyat kodeksi yanada vahshiylashtirilyapti va endi safarbarlik, urush davri, harbiy harakatlar qoidalari, oqibatlar keltirib chiqaradigan o‘ta dahshatli qamoq jazolari kiritilmoqda. Quturgan printer laqabli gosduma bugunning o‘zida, federatsiya kengashi hatto tunda qonunni tasdiqlashi mumkin.

Ikkinchi yomon xabar. Fas degan topshiriq bo‘lishi bilan rus bosqinchilar va ularning ityaloqlari bosib olingan Donetsk, Lugansk, Xerson va Zaporojye hududlarida 23–27-sentabr kunlari Rossiyaga qo‘shilish bo‘yicha referendumlar o‘tkazish harakatiga tushib qolishdi. Na ichki, na xalqaro qonunlarga muvofiq keladigan bu referendumlar feyk ekanini bosqinchilar o‘zlari ham bilishini va asl maqsad boshqa ekanini yodda tutib turing.

Uchinchi yomon xabar. Mehnat migrantlari uchun qurilgan Saxarovo markazida xorijliklarga Rossiya armiyasiga xizmatga kirish uchun infratuzilma yaratilmoqda. Migrantlar shu yerning o‘zida Rossiya armiyasiga qo‘shilishi mumkin. Bugunning o‘zida gosduma Rossiya armiyasida xizmat qiluvchilarga rus fuqaroligini eng oson tartibda berishni ta’minlovchi qonunni tasdiqladi.

Shunday qilib, kelasi hafta ommaviy mobilizatsiya va migrantlarni armiyaga tortish tadbirlari boshlanishi ehtimoli soat sayin oshib boryapti. Fikrlar mutlaqo shaxsiy, — deb yozadi iqtisodchi bloger.

Shuningdek, yurist Zarnigor Omonillayeva ham ushbu jarayon yuzasidan Telegram-kanalida “Ehtiyot bo‘ling!” sarlavhali post qoldirdi. Unda chet davlatlar armiyasiga yollanma askar sifatida qo‘shilganlik uchun qanday jazolar bor ekani Markaziy Osiyo mamlakatlari misolida tushuntirib berilgan.

Birin-ketin ochiqlanayotgan qonunlardagi o‘zgarishlarga ko‘ra, endi Rossiya fuqaroligini 1 yildan ortiq Rossiyada yollanma harbiy bo‘lib, xizmat qilganlarga berishmoqchi. Ya’ni Rossiya idoralarining birortasi tarkibida bir yildan ortiq xizmat qilsangiz, fuqarolik taklif qilishmoqda.

Bu haqida qonun Gosdumada uch muhokamadan o‘tgan. Agar senat ma’qullab, prezident imzo qo‘ysa, qonun kuchga kiradi. Hozircha 20.09.2022-yil holatiga ko‘ra kuchga kirgani yo‘q.

Shu o‘rinda eslatib qo‘ymoqchiman:

O‘zbekiston Respublikasi fuqarolari Jinoyat kodeksining 154.1-moddasiga ko‘ra chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirish, yollangani uchun 3 yildan 5 yilgacha ozodlikni cheklash yoki ozodlikdan mahrum qilish bilan jazolanadi. Bundan tashqari, yollanish uchun ham Jinoyat kodeksining 154-moddasi bor. Yollanma askar bo‘lganlar 7 yildan 12 yilgacha ozodlikdan mahrum etiladi.

Tojikiston Respublikasi fuqarosi bo‘lsangiz, Tojikiston Jinoyat kodeksining 401.1-moddasiga ko‘ra 12 yildan 20 yilgacha qamoq jazosiga tortilasiz.

Qirg‘iziston Respublikasi fuqarolari Qirg‘iziston Jinoyat kodeksining 416-moddasiga ko‘ra 7 yildan 15 yilgacha qamoq jazosiga tortiladi.

Qozog‘iston Jinoyat kodeksining 162.1-moddasiga ko‘ra Qozog‘iston fuqarolari 7 yilgacha ozodlikdan mahrum etiladi.

Shuning uchun Saxarovoda Moskva meri tarafidan e’lon qilingan harbiy xizmatga yollanish punktlarini 700 metr naridan aylanib o‘ting, u yerga yaqinlashmang. Judayam xunuk va boshqa davlatlarga nisbatan hurmatsizlik shaklida tashkil etilayotgan ushbu punkt bejizga aynan Saxarovoda yo‘lga qo‘yilmayapti. Saxarovoga oddiy migrantlar keladi. Asosan patent uchun keladi. Ularni aldash esa oson.

Hali qabul qilinmagan qonun uchun allaqachon yollanma askarlarni rasmiylashtiradigan infratuzilmani tashkil etish ochiqdan ochiq urushga targ‘ibot sanaladi, — deb yozadi u.

Tadbirkor Firuz Allayev ham Rossiya Qurolli kuchlari safiga qo‘shilganlik uchun mamlakat fuqaroligi berilishi haqidagi xabarlarga shaxsiy munosabatini bildirib o‘tdi.

Endi kimda kim Rossiya armiyasiga bir yilga yollanma askar bo‘lsa, unga muammosiz Rossiya fuqaroligi beriladi. Bu nima degani? Bu Ukrainadagi urushda foydalanish uchun Markaziy Osiyodan kelgan migrantlarni jalb qilishmoqchi. Rossiyada patent ololmay qiynalib yurgan ishchiga fuqarolik qiziq bo‘lishi mumkin.

Lekin O‘zbekiston qonunlari bo‘yicha boshqa davlat armiyasiga yollangan shaxs 7 yildan 12 yilgacha qamaladi. Endi ruslar shunchaki shartnoma qilasan, zaxirada turasan, urushga bormaysan, degan aldovlar bilan biznikilarni jalb qilishi mumkin. Lekin amalda yollangan askar Ukrainada urushning o‘chog‘iga tashlanadi. U yerda Rossiya armiyasining ahvoli bo‘lsa juda og‘ir.

Ehtiyot bo‘ling, Rossiya ketadigan va ketgan yaqinlaringizni ogohlantiring. Rossiya pasportiga qiziqib, jinoyatchiga aylanishmasin, ham hayotlarini xavf ostiga qo‘yishmasin, — deya ogohlikka chaqiradi Allayev.

Ma’lumot uchun, Ukraina Qurolli kuchlari strategik aloqa departamenti vakillari Markaziy Osiyo aholisiga murojaat bilan chiqqandi. Ularning Markaziy Osiyo aholisiga qilgan murojaatida O‘zbekiston va boshqa Markaziy Osiyo mamlakatlari aholisidan uyda qolib, o‘z vatanlari farovonligi uchun xizmat qilishlari so‘ralgan.

O‘zbekiston fuqarolari, boshqa buyuk turkiy xalqlar vakillari, sizlar Rossiya tomonidan Ukrainaga urushga borib, Putinning xohish-istaklari yo‘lida o‘zingizni qurbon qilmang. Uyda qoling va mamlakatingizga xizmat qiling, — deyilgan StratCom bayonotida.

Avvalroq Ukraina bosh razvedka boshqarmasi Rossiya Moskva viloyatida O‘zbekiston, Tojikiston va Qirg‘iziston fuqarolarini Qurolli kuchlar safiga jalb etayotgani haqida xabar bergandi.

Mavzuga doir:

• LXRda zudlik bilan Rossiyaga qo‘shilish bo‘yicha referendum o‘tkazish taklif qilindi
• LXR Rossiyaga qo'shilish bo'yicha referendumni “bir kunda bitadigan ish emas” deb atadi
• LXRdan keyin DXRda ham zudlik bilan referendum o‘tkazish masalasi ko‘tarildi